Խորհրդային Միության առաջին ու վերջին նախագահ Միխայիլ Գորբաչովը մեկնաբանել է Բրիտանիայի նախկին վարչապետ Մարգարետ Թետչերի մահը՝ նրան անվանելով «քաղաքական գործիչ, որի խոսքը մեծ կշիռ ուներ»:
«Մեր առաջին հանդիպումը 1984թ. սկիզբ դրեց հարաբերությունների, որոնք եղել են երբեմն բարդ, միշտ չէ, որ հարթ են եղել, սակայն երկու կողմից էլ՝ լուրջ և պատասխանատու»,- հիշել է Գորբաչովը:
Ինչպես հաղորդում է BBC-ն, Գորբաչովի խոսքով՝ իր և Թետչերի միջև աստիճանաբար զարգացել են մարդկային հարաբերություններ, որոնք գնալով ավելի բարեկամական են դարձել:
«Վերջին հաշվով մեզ հաջողվում էր հասնել փոխհամաձայնության, և դա ներդրում էր մեր երկրի և Արևմուտքի միջև մթնոլորտի փոփոխության և սառը պատերազմի ավարտի հարցում»,- ասվում է «Գորբաչով-ֆոնդ»-ի կայքում հրապարակված հաղորդագրության մեջ:
Հիշեցնենք, Բրիտանիայի նախկին վարչապետը մահացել է այսօր առավոտյան ուղեղի կաթվածից:
