Վաղը դիակ լինելու է: Այսօր լրագրողների հետ հանդիպման ժամանակ այս մասին ասաց «Ղարաբաղ» կոմիտեի անդամ Աշոտ Մանուչարյանն՝ անդրադառնալով հարցին, թե ինչ է լինելու վաղը:
Նա հստակեցրեց, որ իր համոզմամբ՝ դիակ լինելու է, թաղումը նույնպես կկայանա, որովհետև դժվար է դիակը երկար թողնել առանց թաղման:
««Դիակ» ասելով՝ մարդկանց նկատի չունեմ, նկատի ունեմ ներկայացուցչական ժողովրդավարական խրտվիլակը: Հույս ունեմ, որ դա վաղը թաղման կենթարկվի, որովհետև կարող է լինել կա՛մ ներկայացուցչություն, կա՛մ ժողովրդավարություն: Պետք է հասկանանք, որ դա մեզ հետ կապ չունի, դա կապիտալի կառավարման համակարգն է, որը մեկ ֆունկցիա է իրականացնում՝ ժողովրդի հիմարացում, երկրների կողոպուտ: Ես կարծում եմ, որ վերջ կտանք այդ համակարգին, կկերտենք նորը: Մեզ պետք է այդ անցումը վերջնականապես կատարել՝ ներկայացուցչական ժողովրդավարությունը թողնելով այն երկրներին, որոնք գտնվում են մոլորությունների շրջանում»,- նշեց Աշոտ Մանուչարյանը, ապա հավելեց, որ իր կարծիքով՝ վաղը հայ ժողովուրդը հրաժեշտ է տալու կառավարման գոյություն ունեցող համակարգին և սկսելու է կառուցել նորը:
