Կիրակի Պաղեստինի ինքնավարության ղեկավար Մահմուդ Աբասը ԱՄՆ պետքարտուղար Ջոն Քերիի հետ հանդիպման ժամանակ հայտարարել է, որ Իսրայելի կողմից պաղեստինցի բանտարկյալների ազատ արձակումը խաղաղ բանակցությունների վերսկսման հիմնական նախապայմանն է: Այս մասին հաղորդում է France-Presse գործակալությունը:
Աբասի խոսքով՝ պաղեստինցիների ազատ արձակումը «կստեղծի ճիշտ մթնոլորտ» խաղաղ գործընթացը վերսկսելու համար:
Ավելի վաղ Աբասը Իսրայելի իշխանություններին մեղադրել է պաղեստինցի բանտարկյալ Մեյսոր Աբու Համդիյայի մահվան մեջ, որը բանտարկված էր իսրայելական բանտերից մեկում: 64-ամյա Աբու Համդիյան, որը 2002թ. ցմահ դատապարտման էր ենթարկվել, մահացել է կոկորդի քաղցկեղից: Ավելի վաղ Իսրայելի իշխանությունները հրաժարվել են Համդիյային ազատ արձակել բուժման կուրս անցնելու նպատակով:
Ակնկալվում է, որ Քերին իսրայելական կողմի հետ հանդիպման ժամանակ կքննարկի պաղեստինա-իսրայելական խաղաղ կարգավորման հարցը:
