Եգիպտոսի նախկին նախագահ Հոսնի Մուբարաքի դեմ առաջադրվել է կոռուպցիոն մեղադրանք: Գլխավոր դատախազ Էալաթ Աբդալլան կարգադրել է նախկին նախագահին ենթարկել 15- օրյա կալանքի: Այս մասին հայտնում է RIA Novosti-ն:
Մուբարաքն արդեն գտնվում է նախնական կալանքի տակ մինչև ապրիլի 16-ը՝ 2011-ի հունվարի հեղափոխական իրադարձությունների ժամանակ ցուցարարների մահվան մեջ մասնակցություն ունենալու մեղադրանքով: 2012-ի ամռանը նա ներքին գործերի նախկին նախարարի հետ այդ գործով ենթարկվել էր ցմահ ազատազրկման, սակայն բողոքարկել էր դատավճիռը: Բողոքարկումը կքննվի ապրիլի 13-ին:
Ինչ վերաբերում է նոր գործին, ապա մարտի սկզբին վարչական դատարանի վերստուգիչ հանձնաժողովը մեղադրել է Մուբարաքին և նրա երկու որդիներին բյուջեից ավելի քան 150 մլն դոլար յուրացնելու մեջ: Քննության վարկածով՝ Մուբարաքն ու նրա որդիները երկար տարիներ եղել են գործած կոռուպցիոն սխեմայի մասնակիցներ: Բյուջետային միջոցները, որոնք ուղղվել են պետության ղեկավարի նստավայրի վերանորոգմանը, նպատակային չեն օգտագործվել, դրանք փոխանցվել են Մուբարաքի ընտանիքի հաշիվներ:
Վերահսկիչ մարմիններ են ներկայացվել աշխատանքների իրականացման մասին կեղծ փաստաթղթեր: Այնուհետև գումարները նախկին նախագահի և նրա մտերիմների կողմից ծախսվել են անշարժ գույք գնելու և շինարարության վրա:
