Թուրքական Zaman թերթի փոխանցմամբ, Վաշինգտոնում Թուրքիայի դեսպան Նամըք Թանը դժգոհ է մնացել երեկ Հայոց ցեղասպանության 96-րդ տարելիցի կապակցությամբ ԱՄՆ նախագահ Բարաք Օբամայի ելույթից, որում նա դարձյալ, «Ցեղասպանություն» եզրույթի փոխարեն, գործածել էր «Մեծ եղեռն» եզրույթը:
Օբամայի ելույթի կապակցությամբ Թանը Twitter-ում նշել է. «Օբամայի ապրիլքսանչորսյան ելույթն արվել է «պատմական սխալ» հենքի վրա, այն «միակողմանի և թերի» է: Պատմական ցավերի «միակողմանի» մեկնաբանումը միմյանցից «հեռացնում» է կողմերին (հայերին ու թուրքերին) և «չի նպաստում» խաղաղությանը:
Անընդունելի է, որ նման կերպ երրորդ կողմը «միջամտում» է Թուրքիայի ներքաղաքական կյանքին ու հայ-թուրքական պատմական հարաբերություններին: ԱՄՆ-ը պետք է նպաստի հայ-թուրքական երկխոսությանը և «զերծ մնա» այդպիսի քաղաքական մոտիվներով «միակողմանի» հայտարարություններ հնչեցնելուց»:
Հիշեցնենք, որ երեկ էլ Նամըք Թանը հույս էր հայտնել, որ Օբաման իր ապրիլքսանչորսյան ելույթում «խելամիտ» կգտնվի և չի գործածի «Ցեղասպանություն» եզրույթը` ընդգծելով, որ նախորդ տարվա իրադարձությունները չպետք է կրկնվեն այս տարի:
Պետք է հիշել, որ այն բանից հետո, երբ նախորդ տարվա մարտի 4-ին ԱՄՆ Կոնգրեսի Ներկայացուցիչների պալատի արտաքին հարաբերությունների հանձնաժողովն ընդունեց Հայոց ցեղասպանությունը ճանաչող թիվ 252 բանաձևը, Նամըք Թանը հետ կանչվեց Անկարա:
