«Մանչեսթեր Յունայթեդ»-ի գլխավոր մարզիչ Ալեքս Ֆերգյուսոնը Goal.com-ի հետ զրույցում նշեց, որ թիմի դարպասապահ Դավիդ Դե Խեան զգալիորեն բարելավել է իր խաղն ընթացիկ մրցաշրջանում:
Հիշեցնենք, որ մրցաշրջանի մեկնարկում նա հիմնական տեղ չուներ թիմի մեկնարկային կազմում և պայքարում էր Անդրես Լինդեգորի հետ, իսկ հունվարին կայացած «Տոտենհեմ»-ի դեմ անհաջող խաղից հետո (2:2) նույնիսկ խոսակցություններ կային, որ «Յունայթեդ»-ը հրաժարվելու է իսպանացու ծառայություններից:
Սակայն 22-ամյա դարպասապահը պատվով դուրս եկավ դժվարին իրավիճակից և վերջին ամիսներին գերազանց խաղ է ցուցադրում: Դե Խեան Պրեմիեր Լիգայի վերջին 6 խաղերում գոլ չի ընդունել և արժանացել է թիմի գլխավոր մարզիչ Ալեքս Ֆերգյուսոնի գովասանքին:
«Ամբողջ պաշտպանության գիծն է բարելավել խաղը: Սակայն Դե Խեայի առաջընթացն ամենանկատելին է: «Սթեմֆորդ Բրիջ»-ում (կայացավ Անգլիայի գավաթի խաղարկության քառորդ եզրափակիչի վերախաղարկումը և ավարտվեց 1:0 հաշվով) նա կրկին անգերազանցելի էր: Վստահ եմ, որ հաջորդ մրցաշրջանում նա ավելի լավ է խաղալու»:
