Սեփական, արտասահմանյան և Իրանի սփյուռքի ներդրումները, ինչպես նաև մասնավոր բիզնեսի խթանումը կդառնան Իրանում տնտեսական աճի և արտադրության մեջ նորագույն տեխնոլոգիաների ներդրման հիմքը, հայտնում է TASS-ը: Այդ մասին հայտնել է Իրանի նախագահ Հասան Ռուհանին` ելույթ ունենալով կառավարության տնտեսական հարցերով ընդլայնված նիստում:
Ռուհանին խոստովանել է, որ համաշխարհային շուկայում նավթի գների անկումը Իրանի տնտեսությանը լուրջ վնաս է հասցրել: Միաժամանակ հուլիսի 14-ին Վիեննայում միջուկային ծրագրի շուրջ Իրանի և «Վեցյակի» միջև ձեռք բերված համաձայնությունը Իրանի համար նոր քաղաքական և տնտեսական հեռանկարներ է բացում, որից Իսլամական Հանրապետությունը պետք է օգտվի, շեշտել է նախագահը: «Տարածաշրջանի պետությունների հետ մենք ցանկանում ենք կառուցել բաց առևտրա-տնտեսական հարաբերություններ»,- հատուկ նշել է նա:
Երկրի տնտեսության և հանրության ակնկալիքների մասին` կապված պատժամիջոցների վերացման հետ, Ռուհանին նշել է, որ համաձայնության կնքումից մինչև դրա իրագործման ժամանակահատվածը Իրանի համար դժվար շրջան է:
Իրանի արտասահմանյան հաշիվներում սառեցված ակտիվների ծավալը կազմում է մոտավորապես 92 միլիարդ դոլար: Կառավարության կարծիքով` Իրանի սփյուռքի ընդհանուր կուտակումների ծավալը հասնում է մինչև 2 տրիլիոն դոլարի: Ավելի վաղ Իրանի կառավարությունը հայտարարել է, որ ցանկալի կլինի ծայրահեղ դեպում այդ կուտակումների 10 տոկոսը ներգրավել իրենց երկրում:
Սեպտեմբերի 27-ին ՄԱԿ-ի ԳԱ 70-րդ նստաշրջանում ելույթ ունենալով ԱՄՆ-ում ապրող իրանցիների առջև՝ Ռուհանին նշել է, որ Թեհրանը կարիք ունի ամենաքիչը $150 միլիարդ ներդրումների, որը թույլ կտա հասնելու ՀՆԱ-ի տարեկան 8% աճի և երիտասարդության շրջանում գործազրկության մակարդակի կրճատման:
Պետական վիճակագրական ծառայության տվյալների համաձայն՝ այս տարվա հոկտեմբերի դրությամբ Իրանում կա 2,6 միլիոն գործազուրկ, որը կազմում է երկրի աշխատունակ բնակչության 11 տոկոսը:
