Բժիշկներն ի վիճակի չեն օգնել 14-ամյա հնդիկ տղային, որը նորմայից 8 անգամ արագ է ծերանում՝ հայտնում է Metro-ն:
Ընտանիքի հետ Մումբայի արվարձանում ապրող Նիհալը ունի կնճռոտ մաշկ, նվաղած վերջույթներ, նրա գանգը ձևով հիշեցնում է այլմոլորակայինի գլուխ, ինչպես նրանց ընդունված է պատկերացնել: Նրա մարմնին մազեր ընդհանրապես չկան:
Նիհալի արագ ծերացման և անսովոր արտաքին տեսքի պատճառը բժիշկները համարում են գենետիկ հազվագյուտ հիվանդությունը՝ Հաթչինսոն-Գիլֆորդի պրոգերիան: Այդ համախտանիշը հանդիպում է 1.000.000-ից մեկի մոտ: Պրոգերիան անբուժելի է: Դրա կրողների կյանքի միջին տևողությունը 13,4 տարի է: Հիվանդությունն ավելի հաճախ հանդիպում է տղաների, քան աղջիկների մոտ:
Մինչև հիմա պրոգերիայի առաջացման պատճառները պարզ չեն: Համարվում է, որ պատճառը LMNA գենի մուտացիան է, որը պատասխանատու է լամինի կոդավորման համար՝ А-սպիտակուցի, որից բաղկացած է բջջաթաղանթի միջուկի շերտերից մեկը:
Այդ համախտանիշով ծնված երեխաները ծնվելիս լիովին նորմալ տեսք են ունենում, ուստի հնդիկ տղայի ծնողները չեն իմացել նրա հիվանդության մասին մինչև նրա մոտ 2 տարեկան դառնալը:
Համախտանիշի կրողներին բնորոշ են ցածր հասակը և կրիտիկական ցածր քաշը: Ներկայում 120 սմ հասակով Նիհալը կշռում է 12,5 կգ:
Արտաքին առանձնահատկությունների պատճառով տղան ստիպված է եղել հեռանալ դպրոցից, քանի որ հասակակիցները մշտապես նրան ծաղրել են՝ անվանելով «այլմոլորակային պապիկ»:
Բժիշկները, որոնք հիմա տղայի վրա քաղցկեղի դեմ դեղամիջոց են փորձարկում, հուսով են դանդաղեցնել նրա ծերացումը: Նրանք նշում են, որ Նիհալի ուղեղը և գիտակցությունը լիովին համապատասխանում են նրա տարիքին: Արագացված ծերանում է միայն մարմինը:
Վաղ մահվան սպասումով Նիհալը որոշել է կազմել իր երազանքների ցուցակը, ինչպիսիք են ASIMO ռոբոտ-շունը և Դիսնեյլենդը:
Տղայի հայրը նշել է, որ կաշխատի իրականացնել Նիհալի բոլոր երազանքները՝ անկախ նրանից, թե երեխային ինչքան է մնացել ապրելու:
