Ադրբեջանական Vesti.az կայքի փոխանցմամբ, Ադրբեջանում մեծ դժգոհություն է առաջացել նրանից, որ տարբեր կազմակերպություններ ու տարբեր երկրների լրատվամիջոցներ շարունակ «խեղաթյուրում» են Ադրբեջանի քարտեզը և Նախիջևանի Ինքնավար Հանրապետությունը (ՆԻՀ) կամ Լեռնային Ղարաբաղը ներառում են Հայաստանի կազմում:
Այս անգամ խոսքը գնում է թուրքական Hurriyet Daily News & Economic Review թերթի մասին, որը տարածաշրջանի խոշոր գետերի (Քուռ-Արաքս) վերաբերյալ իր քարտեզում ՆԻՀ-ը ներառել է Հայաստանի կազմում:
Այս կապակցությամբ ադրբեջանական կողմը նշում է. «Մենք արդեն չգիտենք` արդյո՞ք սա միտումնավոր է արվել, թե՞ ոչ, այնուամենայնիվ, փաստը մնում է փաստ: Սակայն վիրավորական է, որ այս անգամ այդպիսի սխալ թույլ է տալիս «եղբայրական» Թուրքիան»:
Հիշեցնենք, որ 2009 թվականի աշնանն էլ Թուրքիայում տպագրված դպրոցական դասագրքերի քարտեզում Թուրքիայի կազմի մեջ էին ներառվել Կիպրոսը, Հյուսիսային Իրաքը, Բաթումը, Նախիջևանը և Հայաստանն ու Արցախը:
Ի դեպ, օրեր առաջ էլ ադրբեջանական կողմը վայնասուն էր բարձրացրել Բալթյան երկրների շուկայում առաջատարներից մեկը հանդիսացող լատվիական Jāņa Sēta հրատարակչատանը տպագրված Ադրբեջանի քաղաքական քարտեզի կապակցությամբ: Դրանում Լեռնային Ղարաբաղն ու հարակից 7 շրջանները նշված էին որպես վիճելի տարածքներ` Ադրբեջանի ու Հայաստանի միջև: Բացի այդ, դժգոհության մեծ տեղիք է տվել ԼՂՀ-ի դրոշի պատկերումը քարտեզի վրա:
