Ադրբեջանական Trend լրատվական գործակալության փոխանցմամբ՝ Ադրբեջանն արձագանքել է մարդու իրավունքների հարցերով համատեղ խորհրդից Եվրոպայի խորհրդի դուրս գալուն։
Համատեղ աշխատանքային խմբի տարածած հայտարարությունում նշված է. «Եվրոպայի խորհրդի գլխավոր քարտուղարի անհիմն որոշումը, որն առնչվում է մարդու իրավունքներով աշխատանքային համատեղ խմբի կազմից իր ներկայացուցչին հանելուն, և որն ընդունվել է հակաադրբեջանական ուժերի պահանջով ու ճնշման ներքո, վնասում է Եվրոպայի խորհրդի հեղինակությանը։
2005 թվականին ստեղծվել է մարդու իրավունքների հարցերով համատեղ աշխատանքային խումբ, որում ընդգրկվել են Ադրբեջանի իշխանությունների ու իրավապաշտպան կազմակերպությունների ներկայացուցիչները։
Քանի որ օրակարգում եղել են մի շարք հարցեր, որոնք առնչվել են երկրում մարդու իրավունքների պաշտպանությանը, աշխատանքային խումբն ընդգծել է, որ տվյալ հարցերը կարող են լուծվել երկրի ներսում՝ պետական մարմինների ու իրավապաշտպան կազմակերպությունների համագործակցության շրջանակներում։
Սակայն հակաադրբեջանական ուժերը, այդ թվում նաև Եվրոպայի խորհրդի մի շարք շրջանակներ, ջանքեր են ձեռնարկել՝ տապալելու իշխանության ու քաղաքացիական հասարակության միջև երկխոսությունը։ 2014 թվականին Եվրոպայի խորհրդի գլխավոր քարտուղար Թյորբորն Յագլանդը դիմեց Ադրբեջանի նախագահ Իլհամ Ալիևին և խնդրեց վերականգնել աշխատանքային խմբի գործունեությունը, և պետության ղեկավարը, բարի կամք ցուցաբերելով, տվեց իր համաձայնությունը:
Կարծում ենք, որ գլխավոր քարտուղարի այդ անհիմն որոշումը վնասում է Եվրոպայի խորհրդի հեղինակությանը»։
