ՄԱԿ-ը Սիրիայի հետ դեռևս համաձայնություն ձեռք չի բերել Հալեպում քիմիական զենքի կիրառման հետաքննության հարցում: Այս մասին հաղորդում է Reuters գործակալությունը՝ վկայակոչելով կազմակերպության անանուն աղբյուրին:
Աղբյուրի խոսքերով՝ տեսուչները հետաքննությունը չեն սկսի այնքան ժամանակ, քանի դեռ պայմանավորվածություն ձեռք չի բերվել դեպքի վայր այցելելու թույլտվության և այլ պայմանների շուրջ:
Սիրիայի դեսպան Բաշար Ջաֆարին և ՄԱԿ-ի զինաթափման հարցերով վարչության ղեկավար Անգելա Քեյնը նամակներ են փոխանակել այս կապակցությամբ: Ջաֆարին ենթադրում է, որ որոշ տեսուչների անհրաժեշտ է թույլ տալ այցելել այն շրջան, որտեղ, ենթադրաբար, կիրառվել է քիմիական զենք, և որ Սիրիան կցանկանար համաձայնեցնել հետազոտող խմբի կազմը: Սա դարձել է խոչընդոտ, քանի որ Քեյնի կարծիքով՝ առաքելության կազմը պետք է որոշի բացառապես ՄԱԿ-ի գլխավոր քարտուղար Պան Գի Մունը: Բացի այդ՝ նա պնդում է, որ տեսուչներին պետք է թույլ տալ այցելել շրջաններ՝ այն հիմքով, որ դրանցում դարձյալ կարող է կիրառվել քիմիական զենք: Արդյունքում՝ Հալեպում դեպքի հետաքննության օրը դեռևս չի նշանակվել:
Հիշեցնենք, որ Սիրիայի կառավարությունը և ընդդիմության գրոհայինները միմյանց մեղադրում են քիմիական զենք կիրառելու մեջ: Խոսքը մարտի 19-ին տեղի ունեցած դեպքի մասին է, երբ թունավոր նյութով լիցքավորված հրթիռի պայթյունի հետևանքով զոհվեց 16, վիրավորվեց շուրջ 100 մարդ:
