Այսօր Հակոբ Հակոբյանի նախագահությամբ ԱԺ սոցիալական հարցերի մշտական հանձնաժողովը քննարկել է «Կուտակային կենսաթոշակների մասին» ՀՀ օրենքում փոփոխություններ և լրացումներ կատարելու մասին» օրենքի նախագիծը, որը ներկայացրել է ֆինանսների փոխնախարար Վարդան Արամյանը:
Փոխնախարարը տեղեկացրել է, որ փոքր շտկումներ են տեղի ունեցել օրենքի նախագծում, մասնավորապես՝ «Հաստատագրված վճարների մասին» ՀՀ օրենքով սահմանված հաստատագրված վճարներով հարկվող կամ «Արտոնագրային վճարների մասին» ՀՀ օրենքի հավելված 7-ի ցանկում ընդգրկված, կամ «Շրջանառության հարկի մասին» ՀՀ օրենքով հարկվող գործունեության տեսակներ համարվող անհատ ձեռնարկատեր կամ նոտար հանդիսացող մասնակիցը պարտավոր է ամսական կատարել կուտակային վճար ոչ թե 1000, այլ 5000 դրամի չափով, որը համարվում է օրենքով շրջանառության հարկով հարկվող գործունեության տեսակներից ստացվող եկամուտներից հաշվարկված կուտակային վճարի գծով վերջնական պարտավորություն:
Հանձնաժողովը օրենքի նախագծին տվել է դրական եզրակացություն՝ ընդգրկելու ԱԺ-ի երրորդ նստաշրջանի մեծ և ապրիլի 8-11-ի քառօրյա նիստերի օրակարգում:
Հեղինակների առաջարկով հանձնաժողովը մեկ տարով հետաձգել է Հեղինե Բիշարյանի և Հովհաննես Մարգարյանի հեղինակած «Բազմազավակ ընտանիքների աջակցության և բազմազավակ մայրերին պետական խրախուսման մասին» օրենքի նախագծի քննարկումը:
Այնուհետև հանձնաժողովը երկրորդ ընթերցմամբ քննարկեց «Հայրենական մեծ պատերազմի վետերանների մասին» ՀՀ օրենքում լրացում կատարելու մասին», «ՀՀ աշխատանքային օրենսգրքում փոփոխություններ կատարելու մասին», «Պետական կենսաթոշակների մասին» ՀՀ օրենքում փոփոխություններ և լրացումներ կատարելու մասին» օրենքի նախագծերը, որոնք ներկայացրել է աշխատանքի և սոցիալական հարցերի նախարար Արտեմ Ասատրյանը:
Հիմնական զեկուցողի խոսքով՝ ստացվել են առաջարկներ, որոնք համատեղ քննարկվել են, և հիմնական փոփոխությունները եղել են խմբագրական բնույթի:
Հանձնաժողովը երկրորդ ընթերցմամբ ներկայացված օրենքի նախագծերին տվել է դրական եզրակացություն՝ ԱԺ ապրիլի 8-11-ի քառօրյա նիստերի օրակարգում ընդգրկելու համար:
