Իրանի արտաքին գործերի նախարար Ալի Աքբար Սալեհին կժամանի Հայաստան` ապրիլի 9-ին մասնակցելու ՀՀ նախագահ Սերժ Սարգսյանի երդմնակալության արարողությանը: Այս մասին այսօր լրագրողների հետ հանդիպման ժամանակ հայտարարեց Իրանի Իսլամական Հանրապետության արտաքին գործերի նախարարության խոսնակ, հանրային դիվանագիտության և մամուլի գլխավոր վարչության ղեկավար Ռամին Մեհմանպարաստը:
Իրանի ԱԳՆ խոսնակը հայտարարեց, որ բարձր է գնահատում Հայաստանի և Իրանի միջև առկա քաղաքական հարաբերությունները: Նրա խոսքով՝ անհրաժեշտ է հնարավորինս զարգացնել դրանք: «Բոլորս պետք է ջանք գործադրենք, որ երկու երկրների միջև խորանան նաև առևտրատնտեսական հարաբերությունները, ինչպես նաև ԶԼՄ-ների համագործակցությունը, որպեսզի դրանք հասնեն քաղաքական հարաբերությունների բարձր մակարդակին»,- ասաց Ռ. Մեհմանպարաստը:
Իրանի ԱԳՆ խոսնակը կարծում է, որ հայկական ԶԼՄ-ները պետք է ավելի մեծ ներկայություն ունենան Իրանում, նյութեր պատրաստեն երկրի ներկայիս վիճակի, անցուդարձի մասին և ներկայացնեն Հայաստանի հանրությանը: Նույնը վերաբերում է նաև իրանական լրատվամիջոցներին: «Պայմաններ կստեղծվեն, որպեսզի երկու երկրների լրագրողները բացառիկ հարցազրույցներ ունենան բարձրաստիճան պաշտոնյաների հետ, ինչի շնորհիվ հարաբերությունների զարգացման ընթացքը ավելի կարագանա»,- ավելացրեց նա:
Ռ. Մեհմանպարաստը նաև նշեց, որ ավելի դյուրին պայմաններ կստեղծվեն երկու երկրների քաղաքացիների այցելությունների համար:
Իրանի ԱԳՆ խոսնակը տեղեկացրեց, որ այցի ընթացքում օգտակար և կառուցողական հանդիպումներ է ունեցել ՀՀ ԱԳ նախարար Էդվարդ Նալբանդյանի և սփյուռքի նախարար Հրանուշ Հակոբյանի հետ: «Այցը լավ առիթ էր՝ քննարկելու տարածաշրջանային և միջազգային կարևորության հարցեր»,- նշեց նա:
