«Մարդ պետք է առնվազն հիմար լինի, որ գնա և կողմ քվեարկի սահմանադրության նախագծի երկրորդ գլխին, որտեղ ամբողջությամբ սահմանափակված են մարդու իրավունքները»,- այսօր Սահմանադրական փոփոխությունները ՀՀ-ում. մարդու իրավունքների և ազատությունների երաշխավորումը թեմայով քննարկման ժամանակ կարծիք հայտնեց փաստաբան Հայկ Ալումյանը։
Վերջինիս խոսքով՝ նախագծում մի շարք լավ դրույթներ կան, բայց երկրորդ գլխում առկա սահմանափակումները անընդունելի են։ Ալումյանը զարմանք հայտնեց, որ մարդիկ իրենց հիմնական իրավունքների սահմանափակման հարցը թողած ամիսներ շարունակ քննարկում են, թե պետք է մեզ արդյոք Խորհրդարանական կառավարման համակարգ, թե ոչ։ Պետք է լինի կայուն մեծամասնություն, երկրորդ փուլ, թե ոչ։ «Պետք է շեղվել այդ հարցերից և քննարկման առարկա դարձնել այս հիմնական հարցերը»,- նկատեց Ալումյանը։
Քննարկմանը մասնակից, իրավապաշտպան, Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցն էլ շեշտադրեց մարդու իրավունքները ոտնահարող, խախտող պետական մարմինների հարցը, հիմնականում իրավապահ մարմինների աշխատանքը, որտեղ առավելագույնս է ոտնահարվում մարդու իրավունքները։
Իրավապաշտպան Ավետիք Իշխանյանի համար, մինչդեռ, առավել կարևոր է, թե ինչպես է ձևավորվում իշխանությունը։ Ըստ նրա՝ մնացած հռչակագրային տեքստերը, ձևակերպումները իրեն քիչ են մտահոգում։ Իրավապաշտպանի համար մտահոգիչ է այն, որ շատ իրավունքներ, որոնք առանց այդ էլ սահմանված են ուրիշ օրենքներում, հռչակագրերում, շատ մանրամասն տեսքով ընդգրկված են սահմանադրության տեքստում, ինչն այդքան էլ ճիշտ չի համարում։
«Չեք անցկացնի» նախաձեռնության անդամ Արմեն Գրիգորյանն էլ «Առաջին լրատվական»-ի հետ զրույցում նկատեց, որ մտահոգիչը նոր սահմանադրության տեքստում միայն 2-րդ գլուխը չէ, այլ ողջ տեքստ,ը և իշխանությունները չեն ջանացել անգամ մի քանի «լավ դրույթ» ընդգրկել նախագծում։
Առավել մանրամասն՝ տեսանյութում:
