Չնայած Երևանի քաղաքապետարանը արդեն հայտարարել է, որ «Էրեբունի-Երևան» տոնակատարությունը չի կարող չեղյալ հայտարարվել, քաղաքացիներն ու նախաձեռնությունները շարունակում են միանալ համացանցում նախաձեռնված առցանց ստորագրահավաքին՝ կոչ անելով Երևանի օրվա տոնակատարության համար նախատեսված գումարով սահմանամերձ համայնքներում որևէ խնդիր լուծել: «Աջակցենք սահմանամերձ բնակավայրերին» նախաձեռնությանը միացողների թիվը անցել է 4000-ը:
«Ո՛չ թալանին» քաղաքացիական նախաձեռնությունը ևս հանդես է եկել կոչ-պահանջով՝ Երևանի տոնին նվիրված գումարի մի մասը փոխանցել սահմանամերձ բնակավայրերից որևէ մեկին: «Օրինակ՝ այդ օրերին, Երևանում հրավառության համար հատկացվելիք գումարով հնարավոր է մեկ կամ մի քանի գյուղի խմելու ջրի հարց լուծել, ապաստարաններ կառուցել, ինչպես նաև սահմանամերձ գյուղերի առանց այն էլ սակավաթիվ բնակիչների այլ հրատապ խնդիրները հոգալ:
Երկրի սահմանների ներկայիս լարված իրավիճակում ճոխություններ թույլ տալը համարում ենք սխալ ու կոչ ենք անում մեր համաքաղաքացիներին և նախաձեռնություններին ակտիվ մասնակցել այս հիմնահարցի վերաբերյալ ստորագրահավաքին։ Մշտապես պետք է հիշել, որ Մենք խաղաղ ենք սահմանի բնակչի և զինվորի շնորհիվ և միևնույն ժամանակ Մենք ուժեղ ենք միասին»,- ասվում է «Ո՛չ թալանին» քաղաքացիական նախաձեռնության ֆեյսբուքյան էջում:
