«Սա քաղաքական սպանություն է»,- Կոտայքի մարզի Պռոշյան համայնքի դաշնակցական գյուղապետ Հրաչ Մուրադյանի սպանությունը երեկ «Հայկական ժամանակի» հետ զրույցում այսպես որակեց ՀՅԴ Գերագույն մարմնի անդամ, Աժ ՀՅԴ խմբակցության ղեկավար Արմեն Ռուստամյանը:
Ուշագրավ է, որ երեկ իշխող ՀՀԿ-ն չէր շտապում որևէ գնահատական տալ տեղի ունեցածին: Այնինչ, ինչպես հայտնում են «ՀԺ» աղբյուրները և ինչպես վկայում են նաև մամուլի նախկին հրապարակումները, ՀՀԿ-ի և ՀՅԴ-ի տեղի ակտիվի հարաբերությունները բավական լարված են եղել: Երբ ՀՀԿ խոսնակ, Աժ փոխնախագահ Էդուարդ Շարմազանովին «ՀԺ»-ն հարցրեց՝ մտադիր չե՞ն գնահատական տալ տեղի ունեցածին, մանավանդ որ պռոշյանցի ՀՀԿ-ականների և դաշնակցականների լարված հարաբերությունների մասին տեղեկություններ կան, նա պատասխանեց. «Սպանության բացահայտումը իրավական տիրույթում է: Անթույլատրելի եմ համարում նման լուրերի տարածումը և հույս եմ հայտնում, որ իրավապահ մարմինները կբացահայտեն մարդասպանին: Ցավում եմ այս դեպքի առիթով և ցավակցում եմ գյուղապետի հարազատներին»:
Մեկ այլ ՀՀԿ-ական Աժ ՀՀԿ խմբակցության քարտուղար, ՀՀԿ խորհրդի անդամ Հովհաննես Սահակյանը, ՀՅԴ ԳՄ-ի երեկվա հայտարարությունը քաղաքական շահարկում որակեց, իսկ «ՀԺ» հարցերը՝ մառազմատիկ: Գյուղապետի սպանության կապակցությամբ ՀՅԴ ԳՄ-ն երեկ հայտարարել էր. «Տեղի է ունեցել կանխամտածված ու ծրագրված սպանություն: Ակնհայտ է նաև, որ անկախ կատարողներից, ոճրագործությունը անպատժելիության և անհանդուրժողական մթնոլորտի հետևանք է (…): Ցավով արձանագրում ենք, որ մեր երկրում երաշխավորված չէ քաղաքացու անվտանգությունը, հանցավոր գործելակերպը մեր կյանքի անբաժանելի մաս է կազմում»: Երբ Հովհաննես Սահակյանին հարցրին, թե ինչու ՀՀԿ-ն դեռ չի արձագանքել տեղի ունեցածին, նա պատասխանեց. «Արձագանքը մեկն է՝ բոլորն էլ դատապարտում են նման արարքները, բայց քանի որ խնդիրը իրավապահ մարմինների տիրույթում է, ճիշտ է այլ մեկնաբանություններից զերծ մնալ»:
– Պարոն Սահակյան, տեղեկություններ կան, որ այդ համայնքում ՀՅԴ–ի ու ՀՀԿ–ի ակտիվի հարաբերությունները բավական լարված էին:
– Ես չէի ցանկանա մտնել այդ դաշտ, չէի ցանկանա նմանատիպ գնահատականներ տալ: Ես հասկանում եմ, որ որոշ հետաքրքրաշարժ շրջանակների համար, եթե հանենք Պարույր Հայրիկյանի դեպքը, մի փոքր անհետաքրքիր անցավ և փորձում են ինչ-որ հետաքրքրություններ կամ սենսացիաներ փնտրել: Որևէ բան այս պահի դրությամբ ավելացնել, կարծում եմ՝ պետք չէ, թողնենք դա նախաքննությանը:
– Բայց սպանվել է համայնքի ղեկավար, ազատամարտիկ, ով նաև Շուշիի հատուկ գնդի հիմնադիրներից էր, իսկ ՀՀԿ–ն շարունակ խոսում է ապահով Հայաստանի մասին:
– Ձեր հարցադրումը այս պահին ճիշտ չեմ համարում և նորմալ չեմ համարում, իսկապես դեպքը բավականին ցավալի է, բայց մեր երկրում տարբեր հանցագործներ տարբեր ժամանակահատվածներում հանցագործություններ են անում, սա չպետք է վերագրել ՀՀԿ-ի ապահով Հայաստան կարգախոսին, որովհետև սա մի փոքր ավելի մառազմի դաշտ է տանում:
– Տեղեկություններ կային, մամուլում նաև հրապարակումներ են եղել, որ գյուղապետի ընտրությունների ժամանակ այնտեղ ծեծկռտուք և ահավոր լարված, թեժ վիճակ է եղել:
– Իրավապահ մարմինները զբաղվում են այս գործով և դեռևս վերջնական գնահատական չկա, չր կարելի դրա հիման վրա գնահատականներ տալ, մեղադրել այս կամ այն կողմին և հիշել 5-6 ամիս կամ 1 տարի առաջվա ինչ-որ կոնֆլիկտներ: Թողնենք, որ այդ գնահատականը տան նախաքննական մարմինները, հետո կտանք քաղաքական գնահատականը:
– Իսկ ի՞նչ կասեք ՀՅԴ–ի գնահատականի մասին, ըստ որի, տեղի է ունեցել կանխամտածված և ծրագրված սպանություն, ոճրագործությունը անպատժելիության և անհանդուրժողականության մթնոլորտի հետևանք է…
– Դա ընդամենը քաղաքական շահարկում է, հուսահատ քաղաքական թիմի մանիպուլյացիա, որը փորձում է տեղի ունեցածը ինչ-որ առիթով կապել այս կամ այն գործընթացի հետ: Ես կոչ եմ անում, որ բոլոր քաղաքական ուժերը այս պահին զերծ մնան նման հայտարարություններից:
«ՀԺ»-ն զրուցեց նաև ՀՅԴ ԳՄ ներկայացուցիչ Արմեն Ռուստամյանի հետ:
– Պարոն Ռուստամյան, այս պահին սպանության կոնկրետ վարկածներ կա՞ն:
– Վարկածներ շատ կան, բայց այս պահին ոչինչ չեմ կարող ասել: Սա խայտառակություն է: Եթե այս տեսակի դեմ էլ են սպանություն ծրագրավորում, ուրեմն, այս երկրում իսկապես լուրջ պրոբլեմներ եկան:
– Տեղեկություններ կան, որ Պռոշյանում ՀՀԿ–ի և ԲՀԿ–ի հարաբերությունները բավականին լարված են եղել:
– Միշտ էլ պայքար է եղել այդ դաշտում: 3 անգամ ինքը ընտրություններում հաղթնլ է իր աշխատանքի և վաստակի արդյունքով:
– Կարելի՞ է ասել, որ սա քաղաքական հողի վրա կատարված սպանություն է:
– Բնականաբար, բա ի՞նչ հողի վրա է: Սա ահաբեկչություն է՝ կատարված այդ տեսակի դեմ, այդպիսի մարդու դեմ: Այդ մարդը ամբողջ կյանքով ապացուցել է, թե որքան է սիրում իր երկիրն ու հայրենիքը և ինչպես կարելի է ճիշտ համայնքապետ լինել: Այդպիսի մարդու սպանությունը ողբերգություն է ողջ հայ ժողովրդի համար:
