ԱՄՆ-ը պատրաստ է համագործակցել Ռուսաստանի և Իրանի հետ՝ հասնելու Սիրիայում հակամարտության հաղթահարմանը։ Դա հաստատել է ԱՄՆ նախագահ Բարաք Օբաման՝ ելույթ ունենալով ՄԱԿ-ի կենտրոնակայանում ծայրահեղականության ու ահաբեկչության դեմ պայքարի հարցերով հանդիպման ժամանակ։ Այս մասին հայտնում է Trend գործակալությունը։
Ինչպես հաստատել է Սպիտակ տան ղեկավարը՝ ԱՄՆ-ը շարունակում է պնդել Դամասկոսում ներառական կառավարության ձևավորման անհրաժեշտությունը, որը չի ներառի Սիրիայի ներկայիս նախագահ Բաշար Ասադին։ Օբաման կարծում է, որ ԴԱԻՇ-ին պարտության մատնելը պահանջում է նոր առաջնորդ և ներառական կառավարություն, որը կմիավորի սիրիացի ժողովրդին ահաբեկչական խմբավորումների դեմ պայքարում։ «Դա բարդ գործընթաց կլինի»,- խոստովանել է վաշինգտոնյան վարչակազմի ղեկավար։
Օբաման վստահեցրել է, որ իրենք պատրաստ են աշխատել բոլոր երկրների հետ, այդ թվում՝ Ռուսաստանի և Իրանի՝ գտնելու քաղաքական մեխանիզմ, որի շնորհիվ հնարավոր կլինի սկսել Սիրիայի նոր իշխանությունների անցման գործընթացը։
