Լիբանանի տարածքում ավելի քան 1.5 մլն սիրիացի փախստականների և 500 հազար պաղեստինցիների ներկայությունը չափազանց բացասաբար է ազդում երկրի անվտանգության, տնտեսության և սոցիալական ինստիտուտների վրա: Լիբանանյան NNA ազգային գործակալության հաղորդմամբ՝ այս մասին հայտարարել է Լիբանանի ԱԳՆ ղեկավար Ջեբրան Բասիլը Նյու Յորքում «G77+Չինաստան» խմբի ԱԳՆ ղեկավարների խորհրդակցության ժամանակ:
«Պատկերացրեք, որ խեղճ Լիբանանը, որի բնակչությունը 4 մլն է, ընդունել է 2 մլն փախստականի, մինչդեռ 500 միլիոնանոց բնակչությամբ հարուստ Եվրոպան մեկ ամսվա ընթացքում ջանքեր է գործադրում 120 հազար փախստականի ընդունելու համար… Այդ ճգնաժամն աղետալի հետևանքներ ունի անվտանգության, տնտեսության, սոցիալական և բնապահպանական ոլորտներում: Այն քանդել է մեր (լիբանանյան) առողջապահության, կրթության, էներգետիկայի, ջրամատակարարման և անվտանգության ինստիտուտների հնարավորությունները»,- ասել է Բասիլը:
Նա նշել է, որ չնայած փախստականների հետ կապված ակնհայտ ճգնաժամին՝ Բեյրութը չի ստանում արտոնյալ պայմաններով երկարաժամկետ անհրաժեշտ օգնություն և ֆինանսական վարկեր:
Լիբանանի ղեկավարությունը նշում է, որ եթե ուշադրություն չդարձվի իրենց նախազգուշացումներին և «տարածաշրջանի (Մերձավոր Արևելքի) նկատմամբ քաղաքականության հարցում արմատական փոփոխություններ» չձեռնարկվեն, երկրները և մայրցամաքները չեն կարողանա լուծել փախստականների հետ կապված խնդիրը:
