Այս տարվա ընթացքում մենք կունենանք դրամի ոչ շատ մեծ արժեզրկում, դրամային վարկերի տոկոսադրույքների ոչ շատ մեծ աճ և միանիշ (ոչ թե երկնիշ) գնաճ: Այսօր նման կանխատեսում արեց «Ամերիաբանկի» զարգացման դեպարտամենտի տնօրեն Տիգրան Ջրբաշյանը: Նրա խոսքով` գնաճը թեև կլինի միանիշ թիվ, բայց 5%-ից էականորեն բարձր կլինի: Դրամի արժեզրկումը, տնտեսագետի խոսքով, բավական դանդաղ է ընթանում, և դրա արագությունը չի համապատասխանում «գործընթացների ռացիոնալ գնահատականներին»:
ՀՆԱ աճը տարեվերջին կլինի 4%-ի շրջակայքում, սակայն հատկապես դրամավարկային գործընթացներում իշխանությունները պետք է շատ զգույշ լինեն, քանի որ դա կարող է լինել նաև 2%-ից 8%-ի շրջակայքում` կախված շուկայի ազդակները ճիշտ գնահատելուց և իրականացվող քաղաքականության օպերատիվությունից:
