Sputnik-Georgia լրատվական գործակալության փոխանցմամբ՝ Վրաստանի Ազգային անվտանգության խորհրդի (ԱԱԽ) նիստում որոշվել է չմեծացնել վրացական բանակի թվակազմը։ Այդ մասին հայտարարել է ԱԱԽ քարտուղար Իրինա Իմերլիշվիլին։
ԱԱԽ անդամները, սակայն, չեն կարողացել ստորագրել համապատասխան փաստաթուղթը, ինչի պատճառը եղել է այն, որ նիստին մասնակցել է նրա 11 մշտական անդամներից միայն 7-ը, մինչդեռ փաստաթղթի ստորագրման որոշման համար անհրաժեշտ է 8 քվե։
Օրենքի համաձայն՝ Վրաստանի զինված ուժերի թվակազմի մասին փաստաթուղթը մինչև հոկտեմբերի 1-ը պետք է ներկայացվի երկրի խորհրդարանի հաստատմանը։ Իմերլիշվիլին ընդգծել է, որ ԱԱԽ-ը որոշել է պահպանել Վրաստանի զինված ուժերի ներկայիս թվակազմը՝ ավելի քան 37.000 մարդ։
Հիշեցնենք, որ Իրինա Իմերլիշվիլին, որը Վրաստանի միակ կին գեներալն է, Վրաստանի ԱԱԽ քարտուղարի պաշտոնում նշանակվել է 2013 թվականի նոյեմբերի վերջին։
