Apple Music երաժշտական սթրիմինգային ծառայությանը դրա թողարկումից երկուսուկես ամիս անց 15 մլն մարդ է բաժանորդագրվել: Այս մասին հայտնում է New York Post-ը՝ հղում անելով սեփական աղբյուրներին:
Պարբերականի տվյալներով՝ Apple-ն ակնկալում է իր երաժշտական ծառայությանը բաժանորդագրել առնվազն 100 մլն օգտատիրոջ, ուստի ընկերությունն առաջարկել է ճկուն գնային քաղաքականություն: ԱՄՆ-ում անհատական բաժանորդագրությունն արժե ամսական 10 դոլար:
Սակայն հարցական է մնում՝ քանի վճարող բաժանորդագիր կմնա, երբ անվճար շրջանի 3 ամիսներն ավարտվեն: Աղբյուրի տեղեկացմամբ՝ Apple Music-ի գրեթե ամեն երկրորդ օգտատերն անջատել է բաժանորդագրության ավտոմատ երկարաձգումը: Սա նշանակում է, որ փորձնական շրջանի ավարտին ծառայության բաժանորդների թիվը կարող է կրկնակի կրճատվել:
