Ադրբեջանական APA լրատվական գործակալության փոխանցմամբ, Ադրբեջանում Թուրքիայի դեսպան Հուլուսի Քըլըչն անդրադարձ է կատարել հայ-թուրքական սահմանի բացմանը.
«Հայ-թուրքական սահմանը փակ է արդեն 18 տարի: Այդ վիճակը կարող է պահպանվել ևս 80 տարի: Ցայժմ ՄԱԿ-ը Լեռնային Ղարաբաղից հայկական զորքերի դուրս բերման մասին ընդունել է 4 բանաձև: Դրանք «պետք է» իրագործվեն: Բոլոր նրանք, ովքեր Թուրքիայի վրա ճնշում են բանեցնում հայ-թուրքական սահմանի բացման հարցում, «պետք է» առաջին հերթին տեսնեն ՄԱԿ-ի բանաձևերը:
Թուրքիան հայ-թուրքական սահմանը փակել է Հայաստանի կողմից «ադրբեջանական տարածքների օկուպացման» պատճառով: Հայ-թուրքական սահմանի բացումից առաջ նախ «անհրաժեշտ է» խոսել հենց դրա մասին: Քանի դեռ դա տեղի չի ունեցել, հայ-թուրքական սահմանը «չի բացվի»:
Թուրքիան մշտապես կլինի Ադրբեջանի կողքին: Մենք պետք է միավորենք մեր ջանքերը, և եթե հանկարծ մեր միջև որևէ խնդիր առաջանա, ապա այն պետք է լուծվի վստահության մթնոլորտում»:
Իր ամփոփիչ խոսքում թուրք դեսպանը նշել է, որ եթե ԱՄՆ-ը «կորցնի» Թուրքիան, ապա «կկորցնի» նաև Ադրբեջանին:
Հիշեցնենք, որ հունվարի վերջին Haaretz-ի մեկնաբան Ալուֆ Բենը գրեց, որ հետագայում Բարաք Օբամային կհիշեն որպես Թուրքիան (ինչպես նաև Եգիպտոսն ու Լիբանանը) «կորցրած» ԱՄՆ նախագահի: