Իրանի և ԱՄՆ-ի միջև տասնամյակներ գոյություն ունեցող թշնամանքը, տարաձայնությունները, վստահության բացակայությունը առաջիկայում չեն անհետանա: Այս մասին CBS հեռուստաալիքի հետ հարցազրույցում ասել է Իրանի նախագահ Հասան Ռուհանին:
Նախագահին հարց է տրվել` նա ԱՄՆ-ին համարում է «Մեծ սատանա՞»: Նաև հիշեցվել է, որ Իրանի գերագույն առաջնորդ այաթոլլա Խամենեին հասարակայնորեն աջակցել է ցուցարարներին` ուրբաթօրյա աղոթքից հետո ակցիայի ժամանակ, ովքեր վանկարկել են «Մա՛հ Ամերիկային» և «Մա՛հ Իսրայելին»:
«Ինչն է կարևոր. այն, թե որ ուղղությամբ ենք մենք շարժվում: Մենք շարժվում ենք թշնամանքի ուժգնացման կո՞ղմը, թե՞ այդ թշնամանքի նշանակությունը մեղմացնելու կողմը: Ես կարծում եմ, որ մենք արեցինք առաջին քայլերը դեպի այդ թշնամանքի մեղմացման կողմ»,- ասել է Ռուհանին:
Այն հարցին, թե ի՞նչ են նշանակում «Մա՛հ Ամերիկային» և «Մա՛հ Իսրայելին» արտահայտությունները, արդյոք դրանք նախատեսված են «ներքին օգտագործմա՞ն համար», թե՞ պետք է բառացիորեն ընկալել, Ռուհանին պատասխանել է, որ Իրանը դեմ չէ ԱՄՆ-ի ժողովրդին:
«Մեր ժողովուրդը հարգում է ամերիկացի ժողովրդին: Իրանցի ժողովուրդը պատերազմ չի փնտրում որևէ երկրի հետ: Սակայն միաժամանակ ԱՄՆ քաղաքականությունն ուղղված էր ընդդեմ իրանցի ժողովրդի շահերի: Հասկանալի է, որ մարդիկ այդ հարցին հիվանդագին արձագանք կցուցաբերեն»,- ընդգծել է Ռուհանին:
