ՀՀ առողջապահության նախարար Արմեն Մուրադյանի մոտ Տավուշի մարզի առողջապահության ոլորտի պատասխանատուների հետ քննարկվել են մարզի առողջապահական ոլորտում բժշկական ծառայությունների, այդ թվում` շտապբուժօգնության կազմակրերպմանն առնչվող հարցեր:
Ինչպես տեղեկացրին ՀՀ առողջապահության նախարարությունից, աշխատանքային խորհդակցության ժամանակ մանրամասն անդրադարձ է կատարվել մարզի բժշկական հաստատությունների կադրային և նյութատեխնիկական, ինչպես նաև շտապօգնության մեքենաներով ապահովվածությանը, առկա խնդիրներին և դրանց լուծման ուղիներին։ Արմեն Մուրադյանը նախարարության համապատասխան ստորաբաժանումներին հանձնարարել է թարմացնել նախարարության կողմից 2014թ. մշակված քարտեզները, որոնցում մանրամասն ամրագրված են բոլոր մարզերի և Երևանի առողջապահական համակարգի այդ տվյալները, ինչպես նաև առողջապահական կարևոր ցուցանիշներն ու կարիքները։
«Կարևոր է, որ մեր մարզերի առողջապահության կազմակերպիչները հստակ իմանան, թե արտակարգ իրավիճակներում ինչ քայլեր են արվելու»,-ասել է նախարարը` շեշտադրելով հատկապես արյան և դեղորայքի պաշարների, լրացուցիչ մահճակալների ծավալման, շտապբուժօգնության հասանելիության, ինչպես նաև մասնագետներով ապահովումը։
Արմեն Մուրադյանը մարզի բժշկական կենտրոնների ղեկավարներին հորդորել է առավել շատ օգտվել կենտրոններում գործող հեռաբժշկության հնարավորություններից, ինչը էականորեն կնպաստի բժշկական օգնության որակի բարելավմանը, ինչպես նաև հիվանդների դեպի մայրաքաղաք հոսքի կրճատմանը։ Միաժամանակ որոշում է կայացվել առաջիկայում հանդիպում կազմակերպել Երևանի Մ. Հերացու անվան բժշկական համալսարանում սովորող տավուշցիների հետ։