«Վերջին շրջանում ոստիկանապետ Ալիկ Սարգսյանի իրականացրած ճանապարհային ոստիկանության բարեփոխումները և կառավարության որոշումները ուղղված են մեր երկրում կոռուպցիոն ռիսկերի նվազեցմանը»,- այսօր այս մասին հրավիրված ասուլիսի ընթացքում հայտարարեց «Աքիլլես» ավտովարորդների իրավունքների պաշտպանության կենտրոնի նախագահ էդուարդ Հովհաննիսյանը որը մինչև վերջերս պայքարել է այդ օրենքների փոփոխության համար:
Նրա խոսքերով, այդ օրենքի համաձայն, եթե նախկինում վարորդները մեքենայի համարանիշները ինչ-ինչ պատճառներով կորցրել էին, պետք է վճարեին 100 հազար դրամ, իսկ նույն համարը վերցնելու համար`հավելյալ 60 հազար դրամ`հիմա նրանք կարող են վճարել 15 հազար դրամ պետական տուրքը: Եթե նախկինում կրկնավճարով էին այս գործընթացը իրականացնում, ապա փոփոխված օրենքից հետո կսահմանափակվեն միապատիկ վճարներով:
Բացի այդ, եթե նախկինում հաշվառումից դուրս գտնվող մեքենան ևս ստիպում էին հաշվառել՝ հակառակ դեպքում տուգանելով 50 հազար դրամ, հիմա հաշվառումից դուրս գտնվող մեքենաները չեն հաշվառվի: Նախկինում, եթե մեքենան սեփականաշնորհման վկայական չուներ`չէր կարող նոտարի մոտ գործարք իրականացնել, հիմա հաշվառման բաժիններում 1-օրյա համարանիշներ են տրամադրում, որպեսզի վարորդները կարողանան անխոչընդոտ այդ գործընթացը իրականացնել:
