Ինչպես նախօրեին հայտարարել է ԱՄՆ պետքարտուղար Հիլարի Քլինթոնը, ԱՄՆ-ն չի պատրաստվում փոխել Լիբիայում իր մասնակցության որոշումը, չնայած այն փաստին, որ ռազմական գործողությունների ընթացքը երկարում է։ «Դեռ շատ վաղ է եզրակացություններ անել, թե ինչ տեղի կունենա»,- ասել է Քլինթոնը: Այս մասին հաղորդում է The Wall Street Journal-ը:
Նա հավելել է, որ ԱՄՆ պահպանելու է գործողությունների նույն ուղին` տեսնելու, թե «արդյոք կարո՞ղ է Լիբիայի ընդդիմությունն օգտվել այն նպաստավոր հնարավորություններից, որոնք ստեղծվում են նրա համար»:
Երեկ այս խնդրի մասին խոսել է նաև ԱՄՆ պաշտպանության նախարար Ռոբերտ Գեյթսը` հայտարարելով, որ ԱՄՆ-ն Լիբիա է ուղարկում անօդաչու ինքնաթիռներ: Նրա խոսքերով` «դա պայմանավորված է Լիբիայում հումանիտար իրավիճակով»: Այս մասին հաղորդում է Reuters գործակալությունը:
Պենտագոնում կարծում են, որ այս ինքնաթիռներն ավելի արդյունավետ կլինեն Քադաֆիի ռեժիմի դեմ պայքարում, քանի որ նրանք ավելի ճշգրիտ հարվածներ կարող հասցնել Լիբիայի զինված ուժերին: Ամերիկյան ուժերն այս զինատեսակն արդյունավետությամբ կիրառում են Աֆղանստանում: Հնարավոր է, որ հենց սա է եղել պատճառը, որ ԱՄն-ն անցնում է Լիբիայում անօդաչու ինքնաթիռների օգտագործմանը:
