«Մինչ օրակարգի ձևավորմանն անցնելը նա քննարկման առարկա է դարձրել վերջին շրջանում հնչող այն տեսակետը, որ կառավարությունն իբր փոխել է իր քաղաքականությունը տեղական ինքնակառավարման մարմինների նկատմամբ»,- կառավարության նիստում այսօր հայտարարեց ՀՀ վարչապետ Տիգրան Սարգսյանը` դիմելով ՀՀ փոխվարչապետ, ՀՀ տարածքային կառավարման նախարարին պարզաբանումների համար:
Վերջում նա ամփոփեց: «Այսպիսով, մենք արձանագրում ենք, որ կառավարությունը չի փորձում լիազորությունները կենտրոնացնել իր ձեռքում, այլ հակառակը` վերջին երեք տարիների օրենսդրական փոփոխությունները, ինչպես նաև կառավարության որոշումները հստակ ցույց են տալիս, որ մենք էապես ընդլայնում ենք տեղական ինքնակառավարման մարմինների լիազորությունները, ավելին, վերացնում ենք այն խոչընդոտները, որոնք առկա են, վերացնում ենք պետական կառույցների միջամտությունը` եթե կան գործառույթներ, որ ՏԻՄ-երը կարող են ինքնուրույնաբար իրականացնել։
Մասնավորապես, օրինակ բերվեց արոտավայրերի օգտագործման գործընթացում պետական կառավարման բոլոր մարմիններին այդ գործընթացից մեկուսացնելը, ինչի շնորհիվ գյուղացին այսօր հնարավորություն ունի ուղղակիորեն պայմանագիր կնքել տեղական ինքնակառավարման մարմնի հետ և օգտագործել արոտավայրերը։ Օրենսդրական փոփոխությունները ևս հստակ այս ուղղությունն են ցույց տալիս։
Սա կարևոր էր, հարգելի գործընկերներ, որովհետև եթե հրապարակային քննադատություն է հնչում, ապա մենք պարտավոր ենք նաև հրապարակային պատասխանել, թե մեր քաղաքական դիրքորոշումը որն է և ինչ քաղաքականություն ենք իրականացնում»,- ասաց Տ. Սարգսյանը` այդպես էլ անհայտ թողնելով այն հարցը, թե այդ որտեղ և ով է նման «հրապարակային քննադատություն» «հնչեցրել» «վերջին շրջանում»: