Mars Express ուղեծրային կայանը Երկիր է փոխանցել Մարսի հարավային բևեռի յուրահատուկ «երկարած» լուսանկարներ, որոնք իր տեսախցիկները ստացել են ուղեծրի՝ կարմիր մոլորակից ամենահեռու կետում: Նկարներում կարելի է տեսնել Մարսի՝ ձմեռվա ընթացքում սովորաբար սառույցի շերտի տակ թաքնված տարածքներ, հայտնում է RIA Novosti-ն՝ հղում անելով Եվրոպական տիեզերական գործակալությանը:
Գիտնականները նշում են, որ Մարսի հարավային բևեռի լուսանկարները յուրահատուկ անկյունից և տարածությունից են ստացվել նրա շնորհիվ, որ զոնդն այդ պահին անցել է իր տեսախցիկների ֆոտոտվիչների հերթական ստուգաճշտումը:
Այդ ուլտրալայն լուսանկարները, մոլորակաբանների խոսքով, հետաքրքիր են ոչ միայն Մարսի գեղեցիկ, բայց անկենդան բնապատկերով, այլ նաև նրանով, որ հնարավորություն են տալիս տեսնել Մարսի մակերևույթի ամենափոքր մասնիկները. բևեռին մոտ շրջաններում լուսանկարի խտությունը կազմում է 1 կմ 1 պիքսելի համար:
Եվրոպական տիեզերական գործակալության ներկայացրած լուսանկարում, բացի Մարսի զգալիորեն կրճատված բևեռային գլխարկից, կարելի է տեսնել խառնարանների մի ամբողջ ընտանիք՝ մոլորակի միջին լայնություններում, 2 հայտնի «ջրանցքները», Դաո և Նիգեր հովիտները, նաև 8 կմ խորությամբ և 2 200 կմ երկարությամբ հսկայական «խոռոչ»՝ Էլլադա հարթավայրը: