Նյու Յորք նահանգի վերաքննիչ դատարանը հաստատել է միլիոնատեր Աստորների ընտանիքի ներկայացուցիչներից մեկի՝ 88-ամյա Էնթոնի Մարշալի դեմ կայացված դատավճռի օրինականությունը: 2009 թվականին նա մեղավոր էր ճանաչվել հարազատ մոր՝ Բրուկ Աստորի ունեցվածքին ապօրինի տիրելու փորձի մեջ: Այս մասին հայտնում է ITAR-TASS-ը:
Դատարանը մերժել է նաև առողջական վատ վիճակի պատճառով ազատ արձակելու մասին Մարշալի խնդրանքը: Այժմ Էնթոնի Մարշալը ստիպված կլինի ճաղերի հետևում անցկացնել 1-3 տարի: Նրա դեմ նման դատավճիռ էր կայացվել մի քանի տարի առաջ, սակայն նա գրավի դիմաց ազատ էր արձակվել՝ մինչ բողոքարկման քննարկման ավարտը:
Բրուկ Աստորը մահացել է 2007 թվականին՝ 105 տարեկանում: Կյանքի մեծ մասը նա նվիրել է բարեգործությանը: Նա նման հնարավորություն է ունեցել այն բանից հետո, երբ երրորդ անգամ ամուսնացել է Վինսենթ Աստորի հետ: Վերջինս ԱՄՆ-ի առաջին խոշոր ունեցվածքի տեր, առևտրական և արդյունաբերող Ջոն Ջեյքոբ Աստորի ծոռն էր:
Տիկինը իր 200 միլիոնանոց ունեցվածքը կտակել է հոգաբարձուների հիմնադրամին, ինչը դուր չի եկել նրա հարսին՝ Շարլինին, որը ամուսնուն հրահրել է մոր ժառանգությունից մաս ստանալու փորձ ձեռնարկել: 2004 թվականին Մարշալը իր փաստաբանի օգնությամբ կեղծել է մոր ստորագրությունն ու փոխել կտակը հօգուտ իրեն:
