ՍԴՀԿ ատենապետ Լյուդմիլա Սարգսյանը դատական կարգով վիճարկում է ԱՆ պետռեգիստրում որպես ՍԴՀԿ ատենապետ Գևորգ Պերկուպերկյանին գրանցելու մասին որոշումը: Դատական վեճը դեռևս շարունակվում է, կուսակցության ներկայացուցիչը հույս ունի, որ դատական մարմինը հաշվի կառնի իրենց անհերքելի փաստերը:
Ինչպես «Առաջին լրատվական»-ի հետ զրույցում տեղեկացրեց ՍԴՀԿ անդամ Գուրգեն Եղիազարյանը, իրենք ունեն արդարադատության նախարարությունից վերցրած անհերքելի փաստեր և տասնյակ սխալներով փաստաթղթեր այն մասին, որ ԱՆպետռեգիստրում Գևորգ Պերկուպերկյանը, որպես ՍԴՀԿ ատենապետ, ապօրինի է գրանցվել:
«Առնվազն երկու-երեք ուղիղ հանցագործություն, կեղծիք ունենք ձեռքի տակ: Եթե այս ապացույցներն անտեսելով՝ Սերժ Սարգսյանի և մյուսների հանձնարարականով դատարանը որոշում կայացնի հօգուտ մյուս կողմի, ապա մենք բոլոր ինստանցիաները կանցնենք, կհասնենք Ստրասբուրգ»,- ասաց Գուրգեն Եղիազարյանը:
Նույնիսկ հօգուտ Գևորգ Պերկուպերկյանի դատական որոշման դեպքում ՀԱԿ մտնել-չմտնելու որոշումը կայացվելու է համագումարի ընթացքում: Գուրգեն Եղիազարյանը հստակեցրեց՝ եթե, իհարկե, խոսքը ՀԱԿ-ի կազմում որպես դաշնակից ընդգրկվելու մասին է:
«Ես որ չեմ դառնա կուսակցության անդամ: Իսկ դաշնակից լինելու հարցը կուսակցության համագումարը կորոշի, ես չեմ կարող այս պահին հստակ բան ասել: Այսօրվա դրությամբ ՀԱԿ մտնելու խնդիր դրված չէ»,- ասաց Գուրգեն Եղիազարյանը:
Լուսանկարը՝ PanARMENIAN Photo-ի