Օմանը քաղաքական ապաստան է տրամադրել Լիբիայի նախկին առաջնորդ Մուամար Քադաֆիի ընտանիքին, որը վերջին ժամանակներս բնակվում էր Ալժիրում: Այս մասին Sky News հեռուստաալիքին հայտարարել է Լիբիայի արտաքին գործերի և միջազգային համագործակցության նախարար Մուհամմեդ Աբդել Ազիզը:
«Այս քայլն արվել է հումանիտար նկատառումներից ելնելով»,- նշել է նախարարը:
Միևնույն ժամանակ օմանյան «Էլ-Վաթան» հրատարակչությունը երկուշաբթի օրը գրել է, որ Քադաֆիի այրուն՝ Սաֆիին, նրա երեք զավակներին՝ Այշեին, Մուհամմեդին, Հաննիբալին, և թոռներին օմանյան իշխանությունները դեռ մի քանի ամիս առաջ լիբիական իշխանությունների թույլտվությամբ և ընդմիշտ (ցանկացած քաղաքական հայտարարություն և Լիբիայի քաղաքական կյանքին խառնվելու փորձեր չանելու պայմանով) քաղաքական ապաստան էին առաջարկել: Քադաֆիի ընտանիքին տեղավորելու բոլոր ծախսերն իր վրա Օմանի կառավարությունն է վերցրել:
Անցած շաբաթ Տրիպոլիում Ալժիրի դեսպանը հայտարարել էր, որ Քադաֆիի ազգականները վաղուց են լքել Ալժիրը, սակայն նա հրաժարվել էր նշել որ երկիրն է ընդունել նրանց:
Ալժիրում գտնվելու ժամանակաշրջանում լիբիական նոր իշխանությունները բազմիցս պահանջել էին հարևան երկրից իրենց հանձնել Քադաֆիի ընտանիքի անդամներին, սակայն Ալժիրը հրաժարվել էր կատարել նրանց պահանջը:
