Ամերիկյան ֆոնդային բորսաները նախորդ օրը զգալի աճ են արձանագրել: Dow Jones-ի ինդեքսն այսքան բարձր եղել էր 2008թ. հունիսին: Այս աճին նպաստել են հումքի գները, ինչպես նաև կորպորատիվ հաշվետվությունների հրապարակումը: Ըստ այդմ` Dow Jones-ն աճել է 1.52%-ով` կազմելով 12453.54: S&P 500 ինդեքսը նույնպես զգալի աճ է արձանագրել` աճելով 1.35%-ով և կազմելով 1330.36 կետ, իսկ NASDAQ-ը` 2,1% և 2802,51 կետ համապատասխանաբար:
Ինչպես Bloomberg գործակալությանը հայտնել է Chase Investment Counsil ընկերության ղեկավար Փիթեր Տուցը` այս եռամսյակը շատ կարևոր է եղել այն առումով, որ մարդիկ փորձում էին հասկանալ, թե արդյո՞ք տնտեսությունը դուրս է գալիս ծանր կացությունից: Նա նշել է, որ շատ ընկերություններ դրական արդյունքով են դուրս եկել այս իրավիճակից, ինչը նշանակում է, որ բորսաներում եկել է «ցլերի» ժամանակը:
Օրինակ S&P 500 հաշվարկելիս հաշվի առնվող 500 ընկերությունների ցուցանիշներից 76%-ը եղել է դրական: Այսպիսի դինամիկա պահպանվում է վերջին 8 եռամսյակների ընթացքում, ինչը չէր դիտվել սկսած 2006թ.-ից:
