Սերժ Սարգսյանը նախապայման է դնում Րաֆֆի Հովհաննիսյանի առջև, ինչն անբարոյականություն է: «Առաջին լրատվական»-ի հետ զրույցում նման կարծիք հայտնեց ՀՀ նախագահի նախկին թեկնածու, իրավաբան, քաղաքագետ, «Ռադիո Հայ» ՍՊԸ տնօրեն Անդրիաս Ղուկասյանը՝ անդրադառնալով ՀՀ նախագահ Սերժ Սարգսյանի՝ «Ժառանգություն» կուսակցության առաջնորդ, նախագահական ընտրություններում ըստ պաշտոնական տվյալների երկրորդ տեղը զբաղեցրած Րաֆֆի Հովհաննիսյանին ուղղված հրապարակային նամակին:
Անդրիաս Ղուկասյանի կարծիքով՝ Սերժ Սարգսյանը նախապայման է դնում Րաֆֆի Հովհաննիսյանի առջև՝ պահանջելով կասեցնել հացադուլը, որից հետո միայն նա պատրաստ կլինի բանակցությունների: Ըստ նրա՝ նման գործելակերպն անհարգալից վերաբերմունք է Րաֆֆի Հովհաննիսյանի նկատմամբ:
«Րաֆֆի Հովհաննիսյանը հացադուլ է հայտարարել, պահանջ է ներկայացրել, բնական է, որ անկախ նրանից՝ դա ինչ պահանջ է, պետք է հարգանքով վերաբերվել դրան, եթե ուզում է, որ իր հետ իսկապես բանակցեն: Հացադուլի մեջ գտնվող մարդու առջև նախապայմաններ դնելը անբարոյականություն է: Այդպիսի բան առհասարակ որևէ պետության պրակտիկայում գոյություն չունի. Սերժ Սարգսյանը նորարարություն է մտցնում»,- նշեց Անդրիաս Ղուկասյանը՝ հավելելով, որ Րաֆֆի Հովհաննիսյանը չի կարող համաձայնվել այդ նախապայմանին: Անդրիաս Ղուկասյանը Րաֆֆի Հովհաննիսյանին խորհուրդ կտար չենթարկվել նախապայմաններին:
Հիշեցնենք, որ ՀՀ նախագահ Սերժ Սարգսյանն այսօր պատասխանել է Րաֆֆի Հովհաննիսյանի՝ օրերս Ազատության հրապարակից հղված նամակին:
Նամակում Սերժ Սարգսյանը հորդորում-խնդրում է Րաֆֆի Հովհաննիսյանին դադարեցնել հացադուլը, մեկ-երկու օր կազդուրվել, որից հետո միասին՝ թուղթ ու գրիչով, հանգիստ, առանց շոուների սկսեն աշխատել: «Լուրջ աշխատել՝ անգամ հիմք ընդունելով հենց Ձեր կողմից առաջարկված, այս պահին թեկուզև շատ հում, շարադրանքը»,- ասված էր նամակում: