Դերասան Վարդան Պետրոսյանն այսուհետ կաշխատի թատրոնում: Թատրոնը Պետրոսյանին աշխատանք է առաջարկել, վերջինս համաձայնել է, և առաջիկա օրերին նրա հետ աշխատանքային պայմանագիր կկնքվի: Այս մասին «Առաջին լրատվական»-ի հետ զրույցում ասաց Պետրոսյանի փաստաբան Նիկոլայ Բաղդասարյանը՝ չմանրամասնելով, թե կոնկրետ որ թատրոնի մասին է խոսքը:
Հիշեցնենք, որ երեկ Կոտայքի մարզի ընդհանուր իրավասության դատարանը որոշում կայացրեց դերասան Վարդան Պետրոսյանի պատիժը բաց ռեժիմով կրելու մասին: Երեկ երեկոյան դերասանը «Նուբարաշեն» քրեակատարողական հիմնարկից տեղափոխվել է ժամանակավոր կացարան, որտեղ սպասելու է ՀՀ քրեակատարողական վարչության հանձնաժողովի որոշմանը` հետագա պատիժը բաց ռեժիմով կրելու պայմանների վերաբերյալ: Իսկ պատիժը բաց ռեժիմով կրել հնարավոր է միայն այն պարագայում, երբ Պետրոսյանի հետ կնքվի աշխատանքային պայմանագիր: Ապա աշխատանքային պայմանագիրը պետք է ներկայացվի քրեակատարողական հիմնարկի ղեկավարին, դա հաստատվի, որից հետո նոր Պետրոսյանը դուրս կգա բաց ռեժիմ:
Նիկոլայ Բաղդասարյանն ասաց, որ Վարդան Պետրոսյանին դուր է եկել աշխատանքի առաջարկը, և նա պատրաստվում է ընդունել այն: Բացի դրանից՝ մեկ այլ պրոդյուսերական ընկերությունից ևս առաջարկ է արվել Պետրոսյանին:
Այսօր «Հայկական ժամանակ» օրաթերթը պարզաբանել էր, թե ինչ է իրենից ներկայացնում բաց ռեժիմը: «Բաց տիպի ՔԿՀ կալանավորները աշխատանք ունենալու դեպքում առավոտյան ժամը 8-ից մինչև երեկոյան ժամը 20.00-ն բաց են թողնվում քրեակատարողական հիմնարկից եւ այդ ընթացքում ըստ էության ազատ են իրենց գործողությունների մեջ: Երեկոյան սահմանված ժամին նրանք պետք է վերադառնան ՔՀԿ և գիշերեն այնտեղ: Այսինքն՝ սա փաստացի կիսաազատ ռեժիմ է»,- գրել է թերթը:
Հիշեցնենք, որ Վարդան Պետրոսյանն անազատության մեջ է 2013թ. նոյեմբերից՝ Երևան-Եղվարդ ավտոճանապարհին տեղի ունեցած ավտովթարի պատճառով: Վթարի հետևանքով զոհվել էին հորեղբորորդիներ Էդգար և Էդուարդ Հակոբյանները: Դերասանը մեղադրվում էր ճանապարհային երթևեկության կամ տրանսպորտային միջոցների շահագործման կանոնները խախտելու համար, որն անզգուշությամբ առաջացրել է երկու կամ ավելի մարդու մահ։
