Ադրբեջանական Turan լրատվական գործակալության փոխանցմամբ՝ ԵԱՀԿ-ի՝ մեդիայի ազատության հարցերով հատուկ ներկայացուցիչ Դունյա Միյատովիչն ու Եվրոպայի Խորհրդի՝ մարդու իրավունքների հարցերով հանձնակատար Նիլ Մույժնիեքսը հանդես են եկել համատեղ հայտարարությամբ, որում դատապարտել են Ադրբեջանում լրագրողուհի Խադիջա Իսմայլովայի հանդեպ կայացված դատավճիռը։
Հայտարարությունում նշված է, որ Ադրբեջանի իշխանությունները շարունակում են ճնշել քննադատական քայլերը։ Միյատովիչը հայտարարել է, որ Իսմայլովայի նկատմամբ անարդար դատավճիռը հստակ ցույց է տալիս, որ Ադրբեջանի իշխանությունները շարունակում են խլացնել քննադատական ձայները։ Միյատովիչն Ադրբեջանի իշխանություններին կոչ է արել դադարեցնել լրագրողների հանդեպ ճնշումները։
Մույժնիեքսը հայտարարել է, որ Խադիջա Իսմայլովան պատժվել է երկրում լրագրողական համարձակ հետաքննություն իրականացնելու համար, և որ Ադրբեջանի իշխանությունները մեկը մյուսի հետևից փակում են քննադատների բերանը. «Դա հարված է Ադրբեջանում մարդու իրավունքները, օրենքի գերակայությունն ու ժողովրդավարությունը հարգելուն»։
Բաքվի՝ ծանր հանցանքները քննող դատարանը Խադիջա Իսմայլովային այսօր դատապարտել է 7.5 տարվա ազատազրկման։