Մարտի 22-ին ՀՀ ոստիկանության պետ, գեներալ-լեյտենանտ Վլադիմիր Գասպարյանը հանդիպել է «Իրավունք» շաբաթաթերթի խմբագրական խորհրդի ներկայացուցիչների հետ: Առիթը խորհրդի որոշումն էր՝ 2012 թ. դատաիրավական ոլորտի լավագույն գործիչ ճանաչելու կապակցությամբ ՀՀ ոստիկանության պետին պատվոգրով պարգևատրելու մասին:
Շնորհակալություն հայտնելով՝ Վլադիմիր Գասպարյանն ընդգծել է, որ դա ոստիկանական ողջ համակարգի աշխատանքի արժևորումն է և կարևորել է այն հանգամանքը, որ վերջին շրջանում ոստիկանությունը այդպիսի գնահատման արժանացել և արժանանում է հատկապես զանգվածային լրատվության միջոցների կողմից, ինչը վկայում է հասարակության կողմից ոստիկանության հանդեպ վերաբերմունքի դրական փոփոխության մասին:
Խոսելով ոստիկանության նոր գործելաոճի առանձնահատկությունների մասին՝ ոստիկանության պետը նաև նշել է, որ ոստիկանական աշխատանքում և համակարգի բարեփոխման ընթացքում հիմնարար է հասարակական գործընթացներից մի քայլ առաջ լինելու սկզբունքը:
Ամփոփելով վերջին տարվա ընթացքում կատարված աշխատանքը՝ ՀՀ ոստիկանության պետը ամենագլխավորը համարել է ոստիկանություն-հասարակություն կապի և փոխվստահության ամրապնդումը:
Հանդիպման ավարտին Վլադիմիր Գասպարյանը ոստիկանական խորհրդանիշերով հուշանվերներ է հանձնել հյուրերին:
