Մեծ Բրիտանիան և Ֆրանսիան այսօր կվերսկսեն փորձերը՝ համոզելու ԵՄ մյուս անդամներին սիրիական ընդդիմությանը զենք մատակարարելու էմբարգոյի կասեցման անհրաժեշտության հարցում: Այս մասին հայտնում է BBC-ն:
Ինչպես սպասվում է՝ այդ թեման կգերիշխի Իռլանդիայում՝ ԵՄ-ում արտգործնախարարների հանդիպման երկրորդ օրը:
Փարիզն ու Լոնդոնը կարծում են, որ Ռուսաստանն ու Իրանը զինում են սիրիական ուժերին, և զենքի մատակարարումն ընդդիմությանը Բաշար Ասադի ռեժիմի վրա ճնշումն ուժեղացնելու միակ միջոցն է:
Եվրոպական մի քանի երկրներ արդեն համաձայնել են Մեծ Բրիտանիայի և Ֆրանսիայի դիրքորոշման հետ, սակայն Գերմանիայի կանցլեր Անգելա Մերկելը հայտարարել է, որ էմբարգոն կասեցնելու երկու երկրների ցանկությունը չի նշանակում, որ մնացած բոլորը պետք է հետևեն նրանց:
Էմբարգոյի ժամկետը լրանում է ընթացիկ տարվա մայիսի վերջին: Լոնդոնն արդեն հասկացնել է տվել, որ պատրաստվում է վետո դնել դրա երկարաձգման վրա՝ մայիսին այդ հարցով կայանալիք քննարկման ժամանակ:
