Ինչպես հաղորդում է France Presse գործակալությունը, Նիգերիայի նախագահական ընտրություններից հետո սկսված բախումների ժամանակ զոհվել է ավելի քան 200 մարդ: Տեղի Կարմիր խաչի գրասենյակից հայտնել են, որ 400 մարդ վիրավորվել է, իսկ ավելի քան 40 հազարը ստիպված լքել են իրենց բնակարանները: Իշխանությունները ձերբակալել են մոտ հազար մարդու:
Տեղեկացնենք, որ բախումները Նիգերիայում սկսվել են ապրիլի 17-ին՝ նախագահական ընտրություններից անմիջապես հետո, երբ հայտարարվել է, որ ընտրություններում հաղթանակ է տոնել գործող նախագահ Գուդլաք Ջոնաթանը, որը հավաքել է քվեների մոտ 57%-ը: Նրա ընդդիմախոսը` Մուհամադ Բուհարին, հավաքել էր ընտրողների ձայների 31%-ը:
Ընտրությունների արդյունքների հրապարակումից հետո ընդդիմությունը հայտարարեց, թե դրանք կեղծվել են, իսկ հրապարակված թվերը չեն արտացոլում ընտրության իրական պատկերը: Բախումներից հետո Բուհարին իր կողմնակիցներին կոչ է արել դադարեցնել բռնությունները:
