Ազատության հրապարակում ելույթ ունեցավ Րաֆֆի Հովհաննիսյանի հայրը՝ Ռիչարդ Կ. Հովհաննիսյանը, ով օրեր առաջ է ԱՄՆ-ից եկել Հայաստան: Նա իր ելույթը սկսեց բոլորին բարևելով, ապա ասաց, որ շնորհավորում է բոլորին, որ Րաֆֆու միջոցով իրենց ձայնը լսելի դարձրեցին.«Պետք է խոստովանեմ, որ ես բոլորովին դեմ էի իր թեկնածությանը, վստահ էի, որ նրան կճնշեին: Ձեր միջոցով ոչ միայն ցնծեցիք Հայաստանը, այլ ամբողջ սփյուռքը, որ նոր հույս ստացավ, նոր հեռանկարներ սկսեց մտածել, թե ինչ կարող է լինել իր դերը այս երկրի բարգավաճման հարցում: Ես միշտ կողմնակից եմ եղել, որ դուրս գան այս վիճակից: Հույս ունեմ, որ այս ճանապարհը կգտնեք փոխզիջման ոգով»:
Ռիչարդ Հովհաննիսյանը իր ելույթն ավարտեց հիշելով երջանկահիշատակ Վազգեն Վեհափառին. «1960-ական թթ, Սովետական Հայաստանի օրոք վեհափառը եկավ ևս այսպես նկարագրեց, որ 1915թ հայ ժողովուրդը խաչվեցավ, իսկ երեք տարի անց, ինչպես Հիսուսը՝ 3 օր անց հարություն առավ: Իսկ հայ ժողովուրդը հարություն առավ 1918-ին: Իմ հույսն ու հավատն այն է, որ այսօրվա մեր ժողովրդի չարչարանքը և Րաֆֆի Հովհաննիսյանի զոհողությունն իզուր չէ, և մենք այս չարչարանքից հետո հարություն պետք է ունենանք»:
