Նյու Յորքի հայտնի «Մետրոպոլիտեն» թանգարանը վերջին 42 տարում առաջին անգամ կաշխատի ամեն օր: Այս մասին հայտարարել է թանգարանի տնօրեն Թոմաս Քեմփբելը՝ տեղեկացնում է ITAR-TASS-ը:
1971-ից «Մեթ»-ը, ինչպես այն անվանում են ամերիկացիները, խնայողության նպատակով փակ էր լինում երկուշաբթի օրերին:
«Մենք ցանկանում ենք, որ բոլոր ցանկացողները հնարավորություն ունենան շաբաթվա ցանկացած օր այցելել «Մետրոպոլիտեն»: Անցած տարի թանգարան է այցելել ռեկորդային թվով մարդ՝ 6.28 մլն: Եվ դա այն դեպքում, երբ երկուշաբթի մենք ստիպված էինք մերժել հազարավոր մարդկանց մուտքը»,- նշել է Քեմփբելը:
Ենթադրվում է, որ թանգարանը նոր ռեժիմի կանցնի այս տարվա հուլիսի 1-ից: Նորարարությունը վերաբերելու է ինչպես Հինգերորդ ավենյուի «Մետրոպոլիտեն»-ին, այնպես էլ նրա մասնաճյուղին՝ The Cloisters միջազգային դղյակին, որը տեղակայված է Մանհեթենի հյուսիսում:
Թանգարանի մուտքի վճարը կմնա նույնը՝ 25 դոլար մեծահասակների, 17 դոլար՝ թոշակառուների և 12 դոլար՝ երեխաների համար: Իհարկե, վճարը խորհրդանշական է: Իրականում թանգարանի գանձերը տեսնելու համար կարելի է վճարել այնքան, որքան ցանկանում ես:
«Մետրոպոլիտենի» հավաքածուում կա շուրջ 2 մլն արվեստի գործ՝ աշխարհի տարբեր ծայրերից:
