Երեկ կայացավ հերթական «կլասիկո»-ն: Վալենսիայի «Մեստալիա» մարզադաշտում կրկին հանդիպեցին «Ռեալ»-ն ու «Բարսա»-ն: Ի տարբերություն մի քանի օր առաջ կայացած խաղի, Մոուրինյոն ընտրել էր 4-3-3 սխեման, սակայն, առանց առաջ քաշված հարձակվողների. Խաղադաշտում չէին Բենզեման, Դի Մարիան ու Ադեբայորը: Ամեն ինչ շատ պարզ էր: «Ռեալ»-ը պետք է ամբողջ կազմով պաշտպանվեր և հնարավորության դեպքում առաջ նետեր արագաշարժ Ռունալդուին ու Դի Մարիային:
Գվարդիոլան անցայալ խաղի համեմատ չնչին, այն էլ` ստիպված, փոփոխություն էր կատարել հիմնական կազմում`վնասվածք ստացած Պույոլի փոխարեն կենտրոնական պաշտպանի դիրքը վստահել էր Մասկերանոյին և խոստումի համաձայն դարպասապահի դիրքը վստահել Պինտոյին:
Առաջին խաղակեսն անցավ Մոուրինյոյի սցենարով. «Բարսելոնա»-ն տիրում էր գնդակին, սակայն «արքայական» ակումբի երեք հենակետայինները Պեպեն, Խեդիրան ու Ալոնսոն ամեն անգամ մրցակցի գրոհները կասեցնում էին` մինչև նրանց տուգանային հրապարակին մոտենալը: Իսկ մադրիդցիների հակագրոհներն իսկապես վտանգավոր էին: 45-րդ րոպեին կատալոնացիները պարզապես հրաշքով փրկվեցին, հերթական հրաշալի հանդիպումն անցկացնող, Պեպեի գլխի հարվածից. գնդակը ետ մղվեց դարպասաձողից:
Երկրորդ խաղակեսում պատկերը բոլորովին այլ էր: «Բարսելոնա»-ի գրոհներն ավելի կազմակերպված էին, իսկ «Ռեալ»-ն անգամ հակագրոհելու հնարավորություն չէր ստանում: Վերջապես Չավին ու Ինիեստան սկսեցին գործել այնպես, ինչպես սովորաբար դա անում են և «Բարսա»-ի հարձակվողները` մեկը մյուսի հետևից հարվածային դիրք դուրս գալով: Գվարդիոլայի սաները կարող էին անգամ խոշոր հաշվով հաղթանակ տոնել, սակայն լարվածությունն ամեն անգամ խանգարում էր նրանց գրոհը եզրափակելու պահին, հրաշալի էր գործում նաև Կասիլիասը: Խաղի հիմնական ժամանակում այդպես էլ գոլեր չգրանցվեցին:
Լրացուցիչ առաջին խաղակեսը հիմնական երկրորդ խաղակեսի տրամաբանակ շարունակությունն էր, ընդամենը մի տարբերությամբ` «Ռեալ»-ին հաջողվեց կազմակերպել միակ և որոշիչ հակահարձակումը: Մարսելոն լավ փոխանցում կատարեց Դի Մարիային, ով ձախ եզրով առաջ ընթացավ ու գնդակն ուղարկեց, տուգանային հրապարակի կենտրոն ներխուժած, Ռոնալդուի ուղությամբ: Պորտուգալացին գլխի դիպուկ հարվածով խփեց իր կարիերայի կարևորագույն գոլերից մեկը: Այդուհետ մադրիդցիներն ընդամենը մեկ խնդիր ունեին` ամեն գնով անառիկ պահել սեփական դարպասը: Եվ նրանք կարողացան դա անել: Մոուրինյոն Իսպանիայում նվաճեց իր առաջին մրցանակը և հերթական անգամ ապացուցեց, որ ինքը ոչ միայն շատ ու սուր խոսել է սիրում, այլև` հրաշալի մարզիչ է: