«Տրանսպորտի թանկացման խնդիրը ոչ թե քաղաքապետարանն էր տեսնում, այլ սպասարկող կազմակերպությունները, որոնք այդ հարցը բարձրացրել էին: Այդ հարցը քննարկվեց, որոշումը կասեցվեց, և ներկա պահին էլ մենք թանկացման խնդիր չունենք մեր առաջ դրված»,- այսօր, ի պատասխան «Առաջին լրատվական»-ի հարցին, ասաց Երևանի քաղաքապետարանի տրանսպորտի վարչության պետ Հենրիկ Նավասարդյանը:
Նա անդրադարձավ նաև վերջերս աշխատանքից ազատված տրոլեյբուսների վարորդների խնդրին: Նավասարդյանը նշեց, որ վարորդների բողոքը հիմնավորված չէր, քանի որ նրանք ուզում էին աշխատել մինչև երեկոյան ժամը 17:00-ն, ինչը, տրանսպորտի վարչության պետի խոսքով, հնարավոր չէ, քանի որ իրենք չեն կարող մարդկանց թողնել փողոցում:
«Մենք ոչ թե նրանց աշխատանքից ազատեցինք, այլ նրանք դիմում գրեցին ու հեռացան: Բայց մենք չենք կարող երթուղին առանց սպասարկման թողնել»,- ասաց Նավասարդյանը:
Հիշեցնենք, որ տրոլեյբուսի վարորդները մի քանի օր գործադուլ էին հայտարարել և նշում էին, որ տնօրինությունն իրենցից պահանջում է աշխատել 14-16 ժամ, ինչը հնարավոր չէ: Տնօրինությունն էլ խզեց այդ աշխատակիցների հետ պայմանագրերը, ովքեր հրաժարվում էին աշխատել այդ գրաֆիկով:
Առավել մանրամասն՝ տեսանյութում:
