MK-Turkey-ի փոխանցմամբ՝ թուրք բարձրաստիճան զինվորական Մեհմեթ Ալքանը, ում եղբայրը զոհվել է «Քրդստանի աշխատավորական» կուսակցության (PKK) զինյալների հարձակման ժամանակ, իր վրդովմունքն է հայտնել կառավարության գործողություններից։ Նրան զայրացրել է նաև, որ իր եղբոր հուղարկավորությանը ներկա են եղել «Արդարություն և զարգացում» կուսակցության (ԱԶԿ) մի շարք պատգամավորներ։
Փոխգնդապետ Մեհմեթ Ալքանը հայտարարել է, որ PKK-ի հանդեպ պետության քաղաքականության փոփոխությունը՝ բանակցային գործընթացից հրաժարվելն ու պատերազմը վերսկսելն են իր եղբոր մահվան պատճառ դարձել։ Կապիտան Ալի Ալքանին հրաժեշտ տալու գործողությունը տեղի է ունեցել Osmaniye Büyük մզկիթում։
Ալքանը ծանր վիրավորվել է ուրբաթ, երբ ինքնաձիգներով ու նռնականետներով զինված PKK-ի ջոկատը Շըրնաք նահանգի Բեյթուշեբափ շրջանում հարձակվել է զինվորական ամրակետի վրա։ Ալքանը ստացած վերքերից մահացել է հաջորդ օրը։ Նրան հրաժեշտ տալու արարողությանը մասնակցել են նաև ԱԶԿ-ական պատգամավորներ, ինչը հանգեցրել է զոհվածի ազգականների բողոքներին ու դժգոհություններին։
Զոհվածի ավագ եղբայր Մեհմեթ Ալքանը հրաժարվել է ԱԶԿ-ական պատգամավորների հետ աղոթել նույն մզկիթում։ Նա զայրացած հայտարարել է, որ իր 32-ամյա եղբայրը, ինչպես նաև մյուս զինվորականները զոհվել են հանուն ԱԶԿ-ի քաղաքական հավակնությունների, որը ձգտում է դեպի արտահերթ ընտրություններ՝ հուսալով, որ կստանա ավելի շատ քվեներ և կստեղծի միակուսակցական կառավարություն։
