Իրանական IRNA լրատվական գործակալության փոխանցմամբ՝ Իրանի ԱԳՆ-ի խոսնակ Մարզիեհ Աֆհամն իրանցի զբոսաշրջիկներին կոչ է արել խուսափել ցամաքային ճանապարհով Թուրքիա մեկնելուց և փոխարենը օգտվել օդանավերից։
Աֆհամն այդ զգուշացումն անելու հետ մեկտեղ հիշեցրել է, որ Իրանի արտգործնախարարը Թուրքիայի դեսպանի հետ հանդիպման ժամանակ քննարկել է իրանցիների անվտանգության խնդիրները, և որ Թուրքիայի կառավարությունը վճռականորեն է տրամադրված խնդրի լուծման հարցում։ Աֆհամը հույս է հայտնել, որ հարցը կլուծվի երկու երկրների պաշտոնատար անձանց միջև համագործակցությամբ։
Սրանից առաջ էլ Աֆհամը հայտարարել էր, որ Իրանի արտգործնախարար Մոհամմադ Ջավադ Զարիֆն այցելելու է հարևան մուսուլմանական երկրներ, այդ թվում նաև Թուրքիա, ուր նրա այցը չեղյալ էր հայտարարվել ոչ վաղ անցյալում։
Հիշեցնենք, որ օրեր առաջ Իրանը բողոքի նոտա հղեց Թուրքիային՝ այն պատճառով, որ «Քրդստանի աշխատավորական» կուսակցության (PKK) զինյալները Թուրքիայի տարածքում հարձակումներ են գործել իրանական ավտոբուսների ու բեռնատարների վրա։ PKK-ի զինյալները երկու անգամ զինված հարձակում են իրականացրել Անկարա-Թեհրան երթուղով ընթացող գնացքների վրա, ինչից հետո Իրանի ղեկավարությունը կասեցրել է այդ ուղղությամբ գնացքների երթերը։ Դա մեծ վնաս է պատճառել Վանի նահանգում զբոսաշրջային ոլորտին։
