«Արթիկ» ՔԿՀ-ում պատիժը կրող՝ Հոկտեմբերի 27-ի գործով կարևոր վկաներից մեկի սպանությունը պատվիրելու և կազմակերպելու համար դատապարտված Արթուր Այվազյանը դուրս է եկել օրեր առաջ հայտարարված հացադուլից:
Հիշեցնենք, որ նա հացադուլի էր դիմել՝ պահանջելով արդարադատության նախարարության քրեակատարողական ծառայության տեղաբաշխման հանձնաժողովից՝ կատարել վերաքննիչ դատարանի որոշումը, որով դատարանը գտել էր, որ դատապարտյալի ռեժիմի փոփոխության մերժումը պետք է լինի պատճառաբանված:
Այվազյանի հարազատների փոխանցմամբ՝ հացադուլի ամբողջ ընթացքում դատապարտյալը հատուկ պատժախցում եղել է առանց անկողնային պարագաների, ներքնակի: Հացադուլի մեջ գտնվելով հանդերձ՝ քնել է մետաղավանդակաճաղերից պատրաստված հարմարության վրա:
Հացադուլի ընթացքում դատապարտյալի պահանջով նրան է այցելել Շիրակի մարզի դատախազության դատախազ Կարեն Գաբրիելյանը: Սակայն, Այվազյանի հարազատների խոսքով, դատախազը, տեսնելով, որ դատապարտյալը գտնվում է հացադուլի մեջ և միևնույն ժամանակ անմարդկային պայմաններում, արձանագրություն է կազմել, սակայն դա, ըստ էության, որևէ հետևանք չի ունեցել:
Ի դեպ, հարազատների փոխանցմամբ, Աթուր Այվազյանը հացադուլի վերաբերյալ գրություն է հասցեագրել Սերժ Սարգսյանին և 3 օրաթերթի, սակայն քրեակատարողական ծառայության պետը գրությունը հասցեագրել է միայն Սերժ Սարգսյանին՝ պատճառաբանելով, որ մնացած հասցեատերերին գրությունը չի կարող ուղարկել, քանի որ A4 ֆորմատի թուղթ չունի:
Այվազյանը ՔԿՀ պետից խնդրել է նաև հնարավորություն ընձեռել հանդիպել լրատվամիջոցների ներկայացուցիչների հետ և ներկայացնել, թե ինչ ապօրինություններ են կատարվում իր հետ: Հույս ունենալով, որ իր պահանջները կկատարվեն, դատապարտյալը դադարեցրել է իր անժամկետ հացադուլը: