Sputnik Georgia լրատվական գործակալության փոխանցմամբ՝ Վրաստանը պատրաստ է օգնել Ուկրաինային՝ կառուցելու համար ժողովրդավարական ու հաջողակ երկիր։ Այդ մասին նշված է Ուկրաինայի արտգործնախարար Պավել Կլիմկինին հասցեագրած Վրաստանի արտգործնախարար Թամար Բերուչաշվիլիի շնորհավորական նամակում։
Ուկրաինայում օգոստոսի 24-ին նշում են Անկախության օրը։ Նամակում Բերուչաշվիլին գրել է. «Վրաստանը, ով աջակցում է Ուկրաինայի ինքնիշխանությանն ու տարածքային ամբողջականությանը, պատրաստ է օգնել և Ուկրաինայի հետ կիսվել ժողովրդավարական ու հաջողակ երկիր կառուցելու փորձով։ Վրաստանի ու Ուկրաինայի միջև բարեկամությունը հենված է ընդհանուր արժեքների ու ձգտումների վրա, որոնցից ամենակարևորը ԵՄ-ին ինտեգրվելն է»։
Ուկրաինային անկախության օրվա կապակցությամբ շնորհավորել են նաև Վրաստանի նախագահ Գեորգի Մարգվելաշվիլին ու վարչապետ Իրակլի Ղարիբաշվիլին, ինչպես նաև պաշտպանության նախարար Թինա Խիդաշելին, ով հայտարարել է, որ Ուկրաինայի հաղթանակը նաև Վրաստանի հաղթանակն է։
