Թուրքական Zaman թերթի փոխանցմամբ՝ հայտնի են դարձել 2013 թվականի դեկտեմբերի 17-25-ը Թուրքիայում մեծ աղմուկ հանած «Մեծ կաշառք» գործով խորհրդարանական հետաքննության մանրամասները։
Գործով անցնում են 4 նախկին նախարարներ՝ ներքին գործերի նախկին նախարար Մուամմեր Գյուլերը, ԵՄ հարցերով նախկին նախարար Էգեմեն Բաղըշը, էկոնոմիկայի նախկին նախարար Զաֆեր Չաղլայանը և քաղաքաշինության նախկին նախարար Էրդողան Բայրաքթարը։
Նրանցից առաջին երեքը մեղադրվում են ընդհանուր 63.5 միլիոն դոլարի կաշառք ստանալու համար։ Մասնավորապես, Զաֆեր Չաղլայանը իրանցի գործարար Ռեզա Զարաբից ստացել է 52 միլիոն դոլար՝ կապված Գանայից Դուբայ մեկնող տարանցիկ ինքնաթիռով Ստամբուլի օդանավակայան մաքսանենգ ճանապարհով 1.5 տոննա ոսկի հասցնելու, Ռեզա Զարաբի համար Halk Bank-ի գործած ապօրինությունների հետ։ Չաղլայանին սպառնում է 22 տարվա ազատազրկում։
Մուամեր Գյուլերն իր հերթին ստացել է 10 միլիոն դոլարի կաշառք՝ Ռեզա Զարաբի գործած բազում ապօրինությունները չկանխելու համար։ Նրան սպառնում է 23 տարվա ազատազրկում։
Էգեմեն Բաղըշի անունը նույնպես շոշափվում է Ռեզա Զարաբի խարդախությունների հետ։ Բաղըշը երեք անգամ Զարաբից ստացել է ընդհանուր 1.5 միլիոն դոլարի կաշառք՝ Զարաբի բյուրոկրատական գործերին հետևելու, նրա հոր համար իտալական վիզա ու կեցության իրավունք ստանալու և այլնի համար։ Բաղըշին սպառնում է 12 տարվա ազատազրկում։
Էրդողան Բայրաքթարի վերցրած կաշառքի մասին որևէ բան չի հաղորդվում։ Նրան սպառնում է 5 տարվա ազատազրկում՝ իր գործառույթները վատ կատարելու համար։
