Օրեր առաջ Ախալքալաքի դումայի նախագահ Համլետ Մովսիսյանը հայտարարել էր, որ իրենք պահանջում են, որպեսզի Վրաստանի խորհրդարանը վավերացնի Տարածաշրջանային լեզուների եվրոպական խարտիան, որին Վրաստանը միացել է 1999 թվականին՝ Միխեիլ Սաակաշվիլիի նախագահության օրոք:
Ինչպես ավելի վաղ տեղեկացրել էինք, այս պահանջը մեծ իրարանցում է առաջացրել Վրաստանի խորհրդարանում: Ջավախքի «Վիրք» չգրանցված կուսակցության նախագահ Դավիթ Ռշտակյանը, ով 2006 թ. Ախալքալաքի դումայի պատգամավոր էր, «Առաջին լրատվական»-ի հետ զրույցում նշեց, որ Վրաստանի «Ազգային շարժման» գլխավոր քարտուղար Վանո Մերաբիշվիլին հայտարարություններ է արել, թե խարտիայի վավերացումը կարող է վտանգել Վրաստանի անվտանգությունը. «Նա առանց թաքցնելու երեկ հայտարարեց, որ այս հարցի բարձրաձայնումը սկսվել է իմ պատգամավոր լինելու ժամանակ, և ինքն ամեն ինչ արել է, որ իմ նման մարդիկ պատգամավոր չդառնան, որպեսզի հայերեն լեզվին տարածաշրջանային կարգավիճակ տալու հարցը նորից չբարձրացվի: Իսկ հիմա խնդիրը մեկ ուրիշ տեղ է՝ ես համաձայն եմ Առնոլդ Ստեփանյանի հետ, որ այն մարդիկ, ովքեր այդ պահանջը ներկայացնում են Վրաստանի խորհրդարանին գուցե և չեն էլ կարդացել խարտիան: Այնտեղ մի քանի դրույթներ են առաջ քաշած, և պետք է ընտրել՝ դրանցից որն է անհրաժեշտ: Ասենք՝ հայերենը պետք է գործածվի աշխատավայրերո՞ւմ, թե՞ օրինակ դատավորներն են պարտավոր հայերեն իմանալ և անհրաժեշտության դեպքում նիստը վարել հայերեն լեզվով, հոգևոր վայրերո՞ւմ է անհրաժետ, թե՞ միայն հասարակական: Իմ կարծիքով՝ պահանջ ներկայացնելուց առաջ պետք է այս ամենը մանրամասն ուսումնասիրվեր»:
Նա հավելեց, որ այն մարդիկ, ովքեր Ախալքալաքի դումայում հիմա նման պահանջ են ներկայացնում, տարիներ առաջ եղել են հենց Միխեիլ Սաակաշվիլիի կուսակցությունից, հետագայում «Վրացական երազանք» դաշինքի իշխանության գալուց հետո դարձել են դաշինքի մաս կազմող կուսակցությունների անդամներ, որոնց թվում են ազգայնականները, հանրապետականները և այլն:
