Գագիկ Ծառուկյանին պատկանող «Առինջ մոլ» առևտրի կենտրոնի աշխատակիցներին բացարձակ չի հուզում, որ «Հրազդան» տոնավաճառի սեփականատեր Աշոտ Աղաբաբյանը սնանկանում է, և տոնավաճառը կարող է փակվել:
Հիշեցնենք, որ ՀՀԿ-ական գործարար պատգամավորի մոտ խնդիրներ առաջացան այն բանից հետո, երբ այս տարվա տարեսկզբին «Հրազդան» տոնավաճառի սեփականատերը բարձրացրեց վաճառակետերի վարձավճարները, և առևտրականներից շատերը նախընտրեցին լքել շուկան: Առիթից օգտվեց Գագիկ Ծառուկյանը, և ընդգծելով իր բարերարի կերպարը, հայտարարեց, որ ինքը նոր առևտրի կենտրոն է կառուցում և պատրաստ է 2-3 տարով անվճար տաղավարներ տրամադրել «Հրազդան» տոնավաճառից հեռացած առևտրականներին:
«Աշոտ Աղաբաբյանը մեզ խեղդում էր, ամեն 6 ամիսը մեկ տեղի փողերը բարձրացնում էր, ու եթե մի օր էլ ուշացնեինք փողը, գալիս մեր կետը կողպում էին, չէին թողնում աշխատեինք ու փողերը փակվեինք: Նրա այդ գործելաոճը վաղ թե ուշ պետք ա նման արդյունքի հասցներ: Մարդիկ չէին կարա անվերջ ստրուկի կարգավիճակով առևտուր անել»,- «Առաջին լրատվական»-ի հետ զրույցում ասաց «Առինջ մոլ»-ում տեղավորված և ներկայումս առևտուր անող մի կին՝ հավելելով, որ չի ափսոսում, որ լքել է նախկին շուկան: «Ես ապրանք ունենամ ու կլիենտ, իսկ թե որտեղ կվաճառեմ էդ ապրանքը, ինձ այնքան էլ չի հուզում: Իմ առևտուրը լինի, փողս աշխատեմ, ուրիշ բան, կներեք, ինձ հետաքրքիր չի»:
Վաճառողներից մեկ ուրիշն էլ անկեղծացավ, թե վստահ են, որ Գագիկ Ծառուկյանն էլ իրենց երկար ազատ շնչելու հնարավորություն չի տա: Վաղ թե ուշ իրենց համար էլ վարձավճարներ կսահմանի, բայց «դե ստեղ ավելի լավ ենք մեզ զգում, մաքուր, սիրուն տաղավարներում ենք առևտուր անում: Բայց «Հրազդան»-ում պայմաններ չկային, դրան էլ զուգահեռ ամեն օր գալիս, նոր պայմաններ էին թելադրում:
Հիշեցնենք, որ հարկային ստուգումների և տուգանքների արդյունքում «Հրազդան» մարզադաշտի սեփականատեր, ԱԺ «Հանրապետական» խմբակցության պատգամավոր Աշոտ Աղաբաբյանի ընկերությունը սնանկ է ճանաչվել, և առաջիկայում հնարավոր է մարզադաշտը և հարակից տարածքները վաճառքի հանվեն:
