ԱԺ «Ժառանգություն» խմբակցության ղեկավար Ռուբիկ Հակոբյանն այսօր ԱԺ նիստում կառավարության հետ հարցուպատասխանի ժամանակ արդարադատության նախարար Հրայր Թովմասյանին հարցրեց, թե ինչու են մերժել միջնորդությունը՝ որ ՍԴ-ն իր լիազորությունների շրջանակներում վերահաշվարկ կատարեր բոլոր ընտրատեղամասերում:
Հ.Թովմասյանի խոսքով՝ երբ բողոքարկման ընդամենը 1 դիմում է եղել, նորից այդ ամենը չի կարելի «փաթաթել ՍԴ գլխին»: Նախարարը կոչ արեց պատգամավորին՝ եթե հարցը քննարկվում է իրավական դաշտում, ուրեմն պետք է մնալ իրավական հարթությունում. «Եթե չենք տարբերակում, եթե ուզում ենք մեր չարածը բարդել ՍԴ-ին, ուզում ենք քաղաքական թատերաբեմում մեզ համար լրացուցիչ բաներ ստանալ, այդ ամենը արդար չի: Այդ վեճը կամ պետք է գնար ՍԴ, կամ պետք է ընդունենք այն խաղի կանոնները, որ սահմանված են օրենսդրությամբ»:
Ռ.Հակոբյանը վիրավորվեց, թե կոռեկտ չի գնահատականներ տալ, թե ով ինչ գիտի: Ըստ նրա՝ 2008-ից հետո ՍԴ-ն հեղեղված էր բացահայտ փաստերով, բայց որոշումը նույնն էր և մեղադրանքերը՝ «չունեք ապացույցներ», դրանք ձևական, անհամոզիչ պատասխան են: Ռ.Հակոբյանը «զավեշտ» անվանեց, որ հենց արդարադատության նախարարը պատշտպանեց Սերժ Սարգսյանին:
Հ.Թովմասյանը հակադարձեց, թե դա նախ Սերժ Սարգսյանի որոշելիքն է, իսկ ՍԴ-ում Թովմասյանը ներկայացրել է որպես իրավաբան և ոչ որպես պաշտոնյա, և այդ օրերին չի օգտվել ծառայողական մեքենայից:
«Պարոն Հակոբյան ջան, Զարուհի ջան, ազնիվ չի: Մի՛ արեք էդպես, մի՛ փորձեք ձեր չարածը բարդել էստեղ: Մի՛ փորձեք հրահրել էդ ամբողջը: Պատրաստ եմ քաղաքական հարթության մեջ բանավեճը տանել, բայց եթե իրավական հարթության մեջ պարտվել եք, ապա սա է, ուրիշ բան չկա անելու»,- կոչ արեց Թովմասյանը:
